ဘင်္ဂလားပင်လယ်အော်တွင် ဖြစ်ပေါ်ခဲ့သည့် ဆိုက်ကလုန်းမုန်တိုင်း “ဒါနာ” အားလျော့သွားပြီဖြစ်သော်လည်း တောင်တရုတ် ပင်လယ်တွင် ဖြစ်ပေါ်နေသော အားကောင်းသောအပူပိုင်းမုန်တိုင်း “ထရမ်မီ” ၏ အရှိန်ကြောင့် တိုင်းပြည်နယ်ရှစ်ခုတွင် မိုးသည်းနိုင်သေးကြောင်း မိုး/ဇလက ယနေ့ အောက်တိုဘာ (၂၅) ရက် ညနေတွင် ထုတ်ပြန်သည်။
လက်ရှိတွင် တောင်တရုတ်ပင်လယ်ပြင်၌ ဖြစ်ပေါ်နေသည့် အားကောင်းသောအပူပိုင်းမုန်တိုင်း”ထရမ်မီ”သည် အနောက်ဘက်ကို ဆက်လက်ရွေ့လျားလာနေသည်ဟု ဆိုသည်။
ယင်းကြောင့် ယနေ့ အောက်တိုဘာ ၂၅ ရက်ညနေပိုင်းအထိ မကွေးတိုင်းတွင် နေရာကွက်ပြီး မိုးကြီးနိုင်ကာ စစ်ကိုင်းအထက်ပိုင်း၊ မကွေး၊ တနင်္သာရီ၊ ကချင်၊ ချင်းနှင့် ရခိုင်ပြည်နယ်တို့တွင် နေရာစိပ်စိပ်၊ စစ်ကိုင်းအောက်ပိုင်း၊ မန္တလေးနှင့် ရှမ်းပြည်နယ် (တောင်ပိုင်း)တို့တွင် နေရာကျဲကျဲနှင့် ကျန်တိုင်းဒေသကြီးနှင့် ပြည်နယ်တို့မှာ နေရာကွက်ကျား မိုးထစ်ချုန်းရွာနိုင်ကြောင်း သိရသည်။
ထို့ပြင် နောက်နှစ်ရက်အတွင်း တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်ကာ အောက်တိုဘာလ (၂၆) ရက်မှန်းချက်အရ မကွေးတိုင်း၊ တင်္နသာရီတိုင်းတို့တွင် နေရာစိပ်စိပ်၊ စစ်ကိုင်းတိုင်း၊ မန္တလေးတိုင်း၊ ကချင်ပြည်နယ်၊ရှမ်းပြည်နယ်(တောင်ပိုင်းနှင့် အရှေ့ပိုင်း)၊ ချင်းပြည်နယ်နှင့် ရခိုင်ပြည်နယ်တိုမှာ နေရာကျဲကျဲ၊ ကျန်တိုင်းဒေသကြီးနှင့် ပြည်နယ်တို့မှာ နေရာကွက်ကျား မိုးထစ်ချုန်း ရွာနိုင်ကြောင်း သိရသည်။
