မလေးရှားနိုင်ငံ၌ ကျင်းပပြုလုပ်ခဲ့သည့် ASEAN Festival of Arts (AFA) ပွဲတော်တွင် မြန်မာ့ယဉ်ကျေးမှု အကအဖွဲ့မှ ပျူအကဖြင့် တင်ဆက်ကပြဖျော်ဖြေခဲ့ကြောင်း နိုင်ငံခြား ရေးဝန်ကြီးဌာန ထုတ်ပြန်ချက်အရ သိရသည်။
မလေးရှားနိုင်ငံ၊ မလက္ကာမြို့၊ Dataran Pengkalan Rama ၌ အောက်တိုဘာ(၂၄) ရက်၊ ညနေပိုင်းက ကျင်းပပြုလုပ်ခဲ့သည့် ASEAN Festival of Arts (AFA) သို့ ကွာလာလမ်ပူမြို့ အခြေစိုက် အာဆီယံ သံရုံးအကြီးအကဲများနှင့်အတူ မလေးရှားနိုင်ငံဆိုင်ရာ မြန်မာသံအမတ်ကြီး ဦးအောင်စိုးဝင်း တက်ရောက်ခဲ့ကြောင်း သိရသည်။
အဆိုပါ ပွဲတော်ကို The 11 th Meeting of ASEAN Ministers Responsible for Culture and Arts (AMCA) နှင့် ၎င်း၏ ဆက်စပ်အစည်းအဝေးများနှင့်အတူ ကျင်းပပြုလုပ်ခဲ့ခြင်းဖြစ်ပြီး ပွဲတော်တွင် အာဆီယံနိုင်ငံများမှ ၎င်းတို့၏ ရိုးရာယဉ်ကျေးမှု အကများဖြင့် ကပြတင်ဆက်ခဲ့ကြရာ မြန်မာ့ယဉ်ကျေးမှုအကအဖွဲ့မှလည်း ပျူအကဖြင့် တင်ဆက်ကပြဖျော်ဖြေခဲ့ကြောင်း သိရသည်။
၎င်းပွဲတော်တွင် အာဆီယံအစည်းအဝေးများသို့ တက်ရောက်ရန် ရောက်ရှိနေသည့် မြန်မာနိုင်ငံ၊ သာသနာရေးနှင့် ယဉ်ကျေးမှုဝန်ကြီးဌာန၊ အမြဲတမ်းအတွင်းဝန် ဦးမြင့်ဦး ခေါင်းဆောင်သော မြန်မာကိုယ်စားလှယ်အဖွဲ့မှလည်း ပါဝင်တက်ရောက်ခဲ့ကြောင်း သိရသည်။
