မြန်မာနှင့် သီရိလင်္ကာ နှစ်နိုင်ငံအကြား ကောင်စစ်ဆိုင်ရာကိစ္စရပ်များအပါအဝင် ဘာသာရေးနှင့် ယဉ်ကျေးမှုကဏ္ဍပူးပေါင်းဆောင်ရွက်မှု မြှင့်တင်နိုင်ရေးတို့နှင့် ပတ်သက်၍ သီရိလင်္ကာနိုင်ငံ သမ္မတနှင့် သီရိလင်္ကာနိုင်ငံဆိုင်ရာ မြန်မာသံအမတ်ကြီးတို့ တွေ့ဆုံဆွေးနွေးခဲ့ကြကြောင်း သိရသည်။
သီရိလင်္ကာနိုင်ငံ သမ္မတ Mr. Anura Kumara Dissanayake အား သီရိလင်္ကာနိုင်ငံဆိုင်ရာ မြန်မာသံအမတ်ကြီး ဒေါ်မာလာသန်းထိုက်က ယမန်နေ့ အောက်တိုဘာ(၂၅)ရက်တွင် ကိုလံဘိုရှိ သမ္မတရုံးသို့ သွားရောက် ဂါရဝပြု တွေ့ဆုံခဲ့ရာတွင် ဆွေးနွေးခဲ့ခြင်းဖြစ်ကြောင်း နိုင်ငံခြားရေးဝန်ကြီးဌာနမှ ထုတ်ပြန်သည်။
ထိုသို့ တွေ့ဆုံရာတွင် မြန်မာနှင့် သီရိလင်္ကာနှစ်နိုင်ငံအကြား ဘာသာရေးနှင့် ယဉ်ကျေးမှုကဏ္ဍပူးပေါင်း ဆောင်ရွက်မှုများ မြှင့်တင်နိုင်ရေး အလေးထား ဆွေးနွေးခဲ့ကြသည့်အပြင် ကောင်စစ်ဆိုင်ရာကိစ္စရပ်များနှင့် ပတ်သက်၍လည်း ဆွေးနွေးခဲ့ကြောင်း သိရသည်။
ထို့ပြင် မြန်မာနှင့် သီရိလင်္ကာနှစ် နိုင်ငံအကြား လက်ဖက်နှင့် အုန်း၊ Tropical Medicine တို့နှင့် ပတ်သက်၍ နည်းပညာဆိုင်ရာ ပူးပေါင်းဆောင်ရွက်နိုင်ရေးအတွက် မြန်မာသံအမတ်ကြီးက တင်ပြဆွေးနွေးခဲ့ကြောင်း သိရသည်။