မြန်မာ့မီးရထားအနေဖြင့် ခေတ်မီလေအေးပေးစက်ပါ (DEMU) ရထားတွဲဆိုင်းများ အသုံးပြုပြေးဆွဲပေးနေသည့် ရန်ကုန် – ပဲခူး ခရီးစဉ်ကို လိုက်ပါစီးနင်းသည့် ခရီးသည်များ အတက်အဆင်း အန္တရာယ်မရှိစေဘဲ အဆင်ပြေစေရန် ဘူတာများ၌ လက်တန်းပါ သံလှေကားများ စီစဉ်ထားရှိကြောင်း သိရသည်။
မြန်မာ့မီးရထားအနေဖြင့် ပြည်သူများ ခရီးသွားလာမှု လွယ်ကူအဆင်ပြေချောမွေ့စေရေး ရထားလမ်းပိုင်း အသီးသီးတွင် လူစီးရထားများ ပြေးဆွဲဆောင်ရွက်ပေးလျက်ရှိပြီး ပဲခူးမြို့တွင်းနှင့် ရန်ကုန်မြို့တွင်း ယာဉ်ကြောပိတ်ဆို့မှု မရှိဘဲ အချိန်တိုအတွင်း ရောက်ရှိစေကာ ဈေးနှုန်းသက်သာစွာ စီးနင်းနိုင်မှုကြောင့် ရထားစီး ခရီးသည် စီးနင်းမှုများပြားလျက်ရှိကြောင်း သိရသည်။
အဆိုပါ DEMU ရထားတွဲဆိုင်းများ ပြေးဆွဲသည့် လမ်းခရီးတလျှောက်ရှိ ဘူတာ(၁၂)ခု၌ လက်တန်းပါ သံလှေကားများ ပြုလုပ်တပ်ဆင်ပေးထားပြီး ရထား ဆိုက်ရောက်/ထွက်ခွာချိန်များ၌ အဆင်ပြေလွယ်ကူစွာ လိုက်ပါစီးနင်းနိုင်စေရေး စီစဉ်ထားရှိကြောင်း သိရသည်။
အဆိုပါ အမှတ်(၁၆)အစုန် ပဲခူး-ရန်ကုန် (DEMU) ရထားသည် ပဲခူးဘူတာမှ နံနက် (၆) နာရီတွင် စတင်ထွက်ခွာ၍ ရန်ကုန်ဘူတာသို့ နံနက် (၈) နာရီ၊ မိနစ် (၂၀) တွင် ရောက်ရှိပြီး အမှတ် (၁၅)အဆန် ရန်ကုန်-ပဲခူး (DEMU) ရထားသည် ရန်ကုန်ဘူတာမှ ညနေ (၄) နာရီ (၄၅) မိနစ်တွင် ပြန်လည်ထွက်ခွာ၍ ပဲခူးဘူတာသို့ ည (၇) နာရီ (၅) မိနစ်တွင် ရောက်ရှိကြောင်း သိရသည်။
ထို့ကြောင့် ပဲခူးမှ ရန်ကုန်သို့ အလုပ်သွား အလုပ်ပြန် အဆင်ပြေမှုရှိကြောင်းနှင့် လမ်းခရီးတွင် ပုဇွန်တောင်၊ မလွှကုန်း၊ သင်္ဃန်းကျွန်း၊ တိုးကြောင်ကလေး၊ ရွာသာကြီး၊ လေးဒေါင့်ကန်၊ ဒါးပိန်၊ ကော့ချဲ၊ ထုံးကြီး၊ ကျောက်တန်း၊ တာဝ၊ ဘုရားသုံးဆူ စုစုပေါင်း ဘူတာ (၁၂)ခု၌ ရပ်တန့်ပေးခြင်းကြောင့် လမ်းခရီးတွင် လိုက်ပါစီးနင်းသူများ များပြားကြောင်း သိရသည်။
