YPS ကတ်များကို KBZ Pay ၊ Wave Money စသည့် Mobile Money Application များမှတစ်ဆင့် ငွေဖြည့်သွင်းနိုင်ရန် လာမည့် ၂၀၂၅ ခုနှစ်တွင် အကောင်အထည်ဖော် ဆောင်ရွက်သွားမည်ဖြစ်ကြောင်း Asia Starmar Transport Intelligent ကုမ္ပဏီလီမိတက်ထံမှ သိရသည်။
YPS ကတ်စနစ်ကို YBS ယာဉ်လိုင်းများ၌ ယာဉ်စီးခပေးချေရာတွင် အကြွေပြဿနာမရှိစေရန် အကောင်အထည်ဖော်ဆောင်ရွက်ခဲ့ခြင်းဖြစ်သည်။
ယခုအခါ ခရီးသည်များ ယာဉ်စီးခပေးချေရာတွင် ပိုမိုအဆင်ပြေစေနိုင်ရန်အတွက် YPS ကတ်စနစ်အပြင် QR Code စနစ်ကိုပါ ပြုလုပ်ပေးထားပြီး လက်ရှိတွင် YPS ကတ်အား တစ်လသုံးပြုသူ (၂၃၀၀၀၀) ကျော်နှင့် QR Code စနစ် အသုံးပြုသူ (၂၀၀၀) ကျော်ရှိကြောင်း သိရသည်။
သို့သော် ခရီးသည်အများစုသည် YPS ကတ်စနစ်ကိုအသုံးပြုမှုများလာသော်လည်း ယာဉ်လိုင်းအချို့သည် စက်များကိုပိတ်ထား၍ ယာဉ်စီးခကောက်ခံနေမှုများရှိနေသည့်အတွက် YRTC ထံသို့ ယာဉ်နံပါတ်နှင့်တကွတိုင်ကြားရန် အသိပေးထားသည်။
