ယခုလတွင်ကျင်းပမည့် တောင်ကြီးတန်ဆောင်တိုင် မီးပုံးပျံပွဲတော်တွင် ညမီးကျည် ၂၆ လုံး၊ စိန်နားပန် ၂၄ လုံးနှင့် နေ့လွှတ်မီးပုံးပျံ ၁၀၀ ကျော် လွှတ်တင်သွားမည်ဖြစ်ကြောင်း ရှမ်းပြည်နယ်(တောင်ပိုင်း) ရိုးရာမီးပုံးပျံပညာရှင်များအသင်းထံမှ သိရသည်။
တောင်ကြီး တန်ဆောင်တိုင်ရိုးရာမီးပုံးပျံပွဲတော်ကို နိုဝင်ဘာ ၉ ရက်မှ ၁၅ ရက်အထိ ၇ ရက်ကြာ အဝေရာမီးပုံးပျံကွင်းတွင် ကျင်းပပြုလုပ်သွားမည်ဖြစ်ပြီး၊အဆိုပါ တောင်ကြီးမြို့ တန်ဆောင်တိုင်ရိုးရာမီးပုံးပျံပွဲတော်ကို အဝေရာမီးပုံးပျံကွင်းတွင် နှစ်စဉ်နှစ်တိုင်းကျင်းပခဲ့ကာ ကိုဗစ်ကပ်ရောဂါနှင့် နိုင်ငံရေးအပြောင်းအလဲများအကြား သုံးနှစ်ကြာ ရပ်နားထားခဲ့ရခြင်းဖြစ်ကြောင်း သိရသည်။
အဆိုပါ မီးပုံးပျံပွဲတော်ကို ယမန်နှစ် ၂၀၂၃ ခုနှစ်မှစ တင်ပြန်လည်ကျင်းပခဲ့ခြင်း ဖြစ်ပြီး အနယ်နယ်အရပ်ရပ်မှ လာရောက်လည်ပတ်သူများဖြင့် စည်ကားသလို ပြည်ပ ခရီးသွားများပါ စိတ်ဝင်စားသည့် ရိုးရာပွဲတော်တစ်ခုဖြစ်သည်။
တောင်ကြီးတန်ဆောင်တိုင် မီးပုံးပျံပွဲတော်တွင် ပြခန်းများ၊ ပျော်ပွဲရွှင်ပွဲများ၊ ဈေးဆိုင်များ၊ ရက်ကန်းပြိုင်ပွဲနှင့် တေးဂီတဖျာ်ဖြေပွဲများထည့်သွင်းသွားမည့်အပြင် ရောင်စုံဓာတ်ပုံပြိုင်ပွဲကိုလည်း ထည့်သွင်းကျင်းပသွားမည်ဖြစ်ကြောင်း သိရသည်။