ရန်ကုန်မြို့တိရစ္ဆာန်ဥယျာဉ်ရှိ ဆင်မကြီးမိုမို၏ အသက် ၇၁ ပြည့် မွေးနေ့အထိမ်းအမှတ်ကို ယနေ့ နိုဝင်ဘာလ ၂ ရက်နေ့ မနက် ၁၁ နာရီ က တိရစ္ဆာန်ဥယျာဉ်အတွင်းမှာစည်ကားစွာကျင်းပပြုလုပ်ခဲ့တာဖြစ်သည်။
အဆိုပါပွဲအခမ်းအနားကို ပြည်သူချစ်အနုပညာရှင်များမှတက်ရောက်ခဲ့ကြတာဖြစ်ပြီး ဆင်မကြီးမိုမို၏ ဆင်ဦးစီးဖြစ်သူ ကိုအောင်ဝင်းသောင်း က
” ဆင်မကြီးမိုမိုကို အခုချိန်ထိ ဆင်ဦးစီးအနေနဲ့ ထိန်းပေးခဲ့တာဖြစ်ပါတယ်။ဆင်မကြီးမိုမိုကအသန့်အပြန်အရမ်းကြိုက်လို့သေချာဂရုစိုက်ရတယ်။ အသက်ကြီးလာတဲ့နောက်ပိုင်း အားဆေးတွေကအစ ထိုးပေးရတယ်။သူ့အတွက်အားရှိစေမယ့်အစားစားတွေကိုသေချာဂရုစိုက်ကျွေးမွေးရတာလေးတွေရှိတယ်” လို့ပြောကြားခဲ့သည်။
ဆင်မကြီးမိုမိုသည် ၁၉၅၃ခုနှစ်တွင် မွေးဖွားခဲ့ပြီး အသက် ၇ နှစ်ကျော်အရွယ် ၁၉၆၁ခုနှစ် ဖေဖော်ဝါရီလတွင် ကယားပြည်နယ် လွိုင်ကော်မြို့နယ်တွင်နေသော ဦးခွန်ဆန္ဒမှ တိရစ္ဆာန်ဥယျာဉ်သို့ လှူဒါန်းခဲ့ကြောင်း၊ သူ့အားထိန်းခဲ့သော ဦးခွန်ဆန္ဒ၏ ဇနီးဖြစ်သူ နော်မိုမိုအား ဂုဏ်ပြု၍ မိုမိုဟု အမည်ပေးခဲ့ခြင်း ဖြစ်ကြောင်းသိရသည်။
