အင်ဒိုနီးရှားနိုင်ငံ အရှေ့ပိုင်း ဖလောရက်စ်ကျွန်းပေါ်ရှိ မီးတောင်ရှင်တစ်လုံးဖြစ်သည့် လီဝိုတိုဘီ လာကီ-လာကီ မီးတောင်သည် တနင်္လာနေ့(နိုဝင်ဘာ ၄) နေ့ အစောပိုင်းတွင် ပေါက်ကွဲခဲ့၍ လူ ၉ ဦးထက်မနည်း ေ-သဆုံးခဲ့သည်ဟု ဒေသဆိုင်ရာ အရာရှိတစ်ဦးက ပြောဆိုသည်။
ကယ်ဆယ်ရေးအဖွဲ့များသည် ပြိုကျသွားသော နေအိမ်အပျက်အစီးများအတွင်း ပိတ်မိနေဖွယ်ရှိသူများကို ရှာဖွေနေကြဆဲဖြစ်သည်ဟု အရှေ့ဖလောက်ရက်စ်ခရိုင်၏ အရေးပေါ်တုန့်ပြန်ရေးနှင့် ထောက်ပံ့ပို့ဆောင်ရေးဌာန အကြီးအကဲ အဗီ မန်ဂိုတာ ဟယ်လန်က ပြောဆိုခဲ့သည်။
“အကဲဖြတ်သုံးသပ်မှုတွေ ကျွန်တော်တို့ လုပ်နေဆဲဖြစ်ပြီး အေ-သအပျောက် ပိုတိုးလာနိုင်ပါတယ်” ဟု သူက ပြောဆိုသည်။
မီးတောင်ပေါက်ကွဲမှုကြောင့် အနီးအနား ကျေးရွာများရှိ ဒေသခံများ အလန့်တကြားဖြစ်ခဲ့ကြပြီး မီးတောင်ပြာများနှင့် အပိုင်းအစများ ပြုတ်ကျလာသဖြင့်လူများစွာသည် ၎င်းတို့၏ နေအိမ်များကို စွန့်ခွာထွက်ပြေးခဲ့ကြသည်။
ပေါက်ကွဲမှုအရှိန်ကြောင့် နေအိမ်များပြိုကျခဲ့ရာမှ ေ-သဆုံးမှုများဖြစ်ရသည်ဟု ကျေးရွာအကြီးအကဲ ပီထရပ်စ် မူဒါက နိုင်ငံပိုင် အင်န်တာရာ သတင်းဌာနကို ပြောသည်။
“ဒေသစံတော်ချိန် မနက် ၁၂း၃၀ လောက်မှာ မီးတောင်ပေါက်ကွဲပါတယ်။ လူဦးရေ ၆ ဦးရှိတဲ့ မိသားစုတစ်စု အပြိုအပျက်တွေအောက် ရောက်သွားခဲ့ပါတယ်” ဟု ပီထရပ်စ်က ပြောဆိုခဲ့သည်။
မီးတောင်ပေါက်ကွဲမှု သက်ရောက်ခဲ့ရာ ဧရိယာကို အစိုးရက ဒီဇင်ဘာ ၃၁ ရက်အထိ အရေးပေါ်အခြေအနေ သတ်မှတ်ကြေညာခဲ့ပြီး အရေးပေါ်တုန့်ပြန်ရေးလုပ်ငန်းများ ဆက်လက်ဆောင်ရွက်လျက်ရှိကြောင်း သိရသည်။
Ref: သည်စတား
