တရုတ်နိုင်ငံ၊ Yichang မြို့နှင့် ဖိလစ်ပိုင်နိုင်ငံ၊ Puerto Princesa မြို့တို့တွင်ကျင်းပခဲ့သည့် ကမ္ဘာ့ဖလားနဂါးလှေလှော်ချန်ပီယံရှစ်လက်ရည်စစ်ပြိုင်ပွဲများအပြီးတွင် မြန်မာလှေလှော်အားကစားအဖွဲ့သည် နိုဝင်ဘာ ၄ ရက်ညနေပိုင်းက ရန်ကုန်လေဆိပ်သို့ပြန်လည်ရောက်ရှိလာခဲ့ကြောင်း သိရသည်။
၎င်းတို့အား ရန်ကုန်တိုင်းအစိုးရအဖွဲ့၏ လူမှုရေးရာ၀န်ကြီးဦးဌေးအောင်၊ အားကစားနှင့်ကာပညာဦးစီးဌာနမှ ညွှန်ကြားရေးမှူးများနှင့်တာ၀န်ရှိသူများ၊ မြန်မာနိုင်ငံလှေလှော်အားကစားအဖွဲ့ချုပ်မှ အမှုဆောင်များ၊ မိဘဆွေမျိုးများ၊ အားကာသိပ္ပံ(ရန်ကုန်)မှ သင်တန်းသား/သင်တန်းသူများက ဂုဏ်ပြုကြိုဆိုခဲ့ကြသည်။
ကမ္ဘာ့ဖလားနဂါးလှေလှော်ချန်ပီယံရှစ်လက်ရည်စစ်ပြိုင်ပွဲများတွင် မြန်မာလှေလှော်အားကစားအဖွဲ့သည် ရွှေတံဆိပ်(၆)ခု၊ ငွေတံဆိပ်(၃)ခုရရှိခဲ့ပြီးနောက် ကမ္ဘာ့အားကစားပြိုင်ပွဲ ချန်ပီယံရှစ် နဂါးလှေလှော်ပြိုင်ပွဲအား ဝင်ရောက်ယှဥ်ပြိုင်ခွင့်ရရှိခဲ့သည်။
ကမ္ဘာ့ဖလားနဂါးလှေလှော်ချန်ပီယံရှစ်လက်ရည်စစ်ပြိုင်ပွဲအား မြန်မာလှေလှော်အားကစားအဖွဲ့မှ အဖွဲ့ခေါင်းဆောင်အဖြစ် မြန်မာနိုင်ငံလှေလှော်အဖွဲ့ချုပ် ဥက္ကဋ္ဌ ဦးသောင်းထိုက်မင်းဦးဆောင်၍ အုပ်ချုပ်သူ/နည်းပြနှင့်အားကစားသမားများ (စုစုပေါင်း၂၃ ဦး)တို့ သွားရောက်ယှဥ်ပြိုင်ခဲ့ကြသည်။
