မြန်မာနိုင်ငံတော်ဗဟိုဘဏ်အနေဖြင့် နိုင်ငံခြားငွေကြေးဈေးကွက် (FX Trading Platform) တွင် သွင်းကုန်လုပ်ငန်းရှင်များအား တရုတ်ယွမ် (၇) သန်းနှင့် ထိုင်းဘတ် သန်း (၂၀) ရောင်းချပေးမည်ဖြစ်ကြောင်း အသိပေးထုတ်ပြန်ထားသည်။
စက်သုံးဆီနှင့် အခြားသွင်းကုန်များ တင်သွင်းရန်အတွက် အဓိကလိုအပ်သည့် ဒေါ်လာ၊ တရုတ်ယွမ်နှင့် ထိုင်းဘတ်တို့ကို FX Trading Platform မှတဆင့် ထုတ်ရောင်းပေးနေခြင်းဖြစ်သည်။
ဗဟိုဘဏ်မှ ဒေါ်လာထုတ်ရောင်းပေးမှုအနေဖြင့် ဩဂုတ်လ (၁) ရက်မှ နိုဝင်ဘာ (၅) ရက်အထိ သုံးလကျော်တွင် ဒေါ်လာ (၂၅၆) သန်းကျော်၊ ထိုင်းဘတ် (၁ ဒသမ ၀၅၄)ဘီလျံနှင့် တရုတ်ယွမ် (၅၁) သန်းကျော်အထိ ထုတ်ရောင်းပေးထားသည်။
ထို့ပြင် ယခုဘဏ္ဍာနှစ်၏ ခုနှစ်လအတွင်း စက်သုံးဆီ၊ စားသုံးဆီနှင့် သွင်းကုန်လုပ်ငန်းရှင်များအတွက် ဒေါ်လာတစ်ဘီလျံကျော် ထုတ်ရောင်းပေးထားပြီး ပြင်ပဈေးကွက်တွင် ဖြစ်ပေါ်နေသည့် ယနေ့ နိုင်ငံခြားငွေလဲလှယ်နှုန်းများမှာ တစ်ဒေါ်လာ (၄၅၃၀) ကျပ်၊ ထိုင်းတစ်ဘတ်လျှင် (၁၃၃.၃၃) ကျပ် ၊ တရုတ်ယွမ်တစ်ယွမ်လျှင် (၆၃၅) ကျပ်ဖြစ်ကြောင်း သိရသည်။
