ဖီလစ်ပိုင်နိုင်ငံမှ နိုဝင်ဘာ ၁၆ ရက်မှ ၂၁ ရက်အထိ အိမ်ရှင်အဖြစ်လက်ခံကျင်းပမည့် ၂၀၂၄ အာဆီယံ အမျိုးသမီး ဖူဆယ်ချန်ပီယံရှစ်ပြိုင်ပွဲ၌ ရလဒ်ကောင်းရရှိရန် အကောင်းဆုံးကြိုးစားသွားမည်ဟု မြန်မာ့လက်ရွေးစင် အမျိုးသမီးဖူဆယ်အသင်းနည်းပြချုပ် ဦးဌေးမြင့်ကပြောသည်။
ပြိုင်ပွဲအကြိုသတင်းစာရှင်းလင်းပွဲအား ယနေ့ နိုဝင်ဘာ ၁၅ ရက်နံနက်ပိုင်းက ဖီလစ်ပိုင်နိုင်ငံရှိ ပြိုင်ပွဲဝင်အသင်းများတည်းခိုသော Marcopolo Hotel ၌ကျင်းပစဉ်ပြောကြားခဲ့ခြင်းဖြစ်ပြီး သတင်းစာရှင်းလင်းပွဲသို့ ဖိလစ်ပိုင်၊အင်ဒိုနီးရှား၊ ထိုင်း၊ ဗီယက်နမ်အသင်းများမှ နည်းပြနှင့် အသင်းခေါင်းဆောင်များလည်း တက်ရောက်ခဲ့ကြသည်။
“အာဆီယံ အမျိုးသမီးဖူဆယ်ချန်ပီယံရှစ်ပြိုင်ပွဲဟာ အတွေ့အကြုံကောင်းတွေရရှိစေမယ့် ပြိုင်ပွဲဖြစ်ပါတယ်။ ပွဲတိုင်းခက်ခဲမှာပါ။ ဒီပြိုင်ပွဲမတိုင်ခင် ထိုင်းမှာလေ့ကျင့်ခဲ့ပြီး ခြေစမ်းပွဲကစားခဲ့ပါတယ်။ ဒါ့ကြောင့် ရလဒ်ကောင်းရဖို့ အကောင်းဆုံးကြိုးစားသွားမှာပါ”ဟု နည်းပြချုပ်ဦးဌေးမြင့်ကပြောသည်။
ထို့ပြင် မြန်မာ့လက်ရွေးစင် အမျိုးသမီးဖူဆယ်အသင်းခေါင်းဆောင် ဖူးပွင့်ခိုင်ကမှလည်း ” ဒီပြိုင်ပွဲဝင်ရောက်ကစားခွင့်ရလို့ကျေနပ်မိပါတယ်။ ဒီပြိုင်ပွဲဟာ လာမယ့် ဇန်နဝါရီလမှာ မြန်မာနိုင်ငံက အိမ်ရှင်အဖြစ်ကျင်းပမယ့် အာရှဖလားအမျိုးသမီးဖူဆယ်ခြေစစ်ပွဲအတွက် အထောက်အကူဖြစ်စေပါတယ်”ဟု ပြောကြားခဲ့သည်။
မြန်မာ့လက်ရွေးစင် အမျိုးသမီးဖူဆယ်အသင်းသည် ၂၀၂၄ အာဆီယံ အမျိုးသမီးဖူဆယ်ချန်ပီ ယံရှစ်ပြိုင်ပွဲအဖြစ် နိုဝင်ဘာ ၁၆ ရက်မြန်မာစံတော်ချိန် ညနေ ၅ နာရီခွဲတွင် အိမ်ရှင် ဖိလစ်ပိုင်အသင်း၊ နိုဝင်ဘာ ၁၇ ရက်မြန်မာစံတော်ချိန်မွန်း လွဲ ၂ နာရီခွဲတွင် ဗီယက်နမ်အသင်း၊ နိုဝင်ဘာ ၁၈ ရက်မြန်မာစံတော်ချိန် ညနေ ၅ နာရီခွဲတွင် ထိုင်းအသင်း၊ နိုဝင်ဘာ ၁၉ ရက်မွန်းလွဲ ၂ နာရီခွဲတွင် အင်ဒိုနီးရှားအသင်းတို့နှင့် ယှဉ်ပြိုင်ကစားရမည်ဖြစ်သည်။