မဏိပူရပြည်နယ်တွင်‌နေဝင်မီးငြိမ်းအမိန့် ထုတ်

လူမျိုးရေးတင်းမာမှုများ လနှင့်ချီ၍ မြင့်တက်နေသည့် အိန္ဒိယနိုင်ငံ မဏိပူရပြည်နယ်တွင် သောင်းကျန်းသူများကိုဖမ်းဆီးခေါ်ဆောင်သွားသည့်လူခြောက်ဦးကို အလေ-ာင်းများအဖြစ်သာ ပြန်တွေ့ခဲ့၍ ဒေါသတကြီးဆန္ဒပြပွဲများပေါ်ပေါက်လာခဲ့ပြီး နိုဝင်ဘာ ၁၆ ရက်တွင် အင်တာနက်လိုင်းများ ပိတ်ပစ်ခဲ့ကာ နေဝင်မီးငြိမ်း အမိန့် ထုတ်ပြန်ခဲ့သည်။

အိန္ဒိယနိုင်ငံ အရှေ့မြောက်ပိုင်းရှိ မဏိပူရပြည်နယ်တွင် လူများစု ဟိန္ဒူဘာသာဝင် ကသည်းများနှင့် လူနည်းစု ခရစ်ယာန်ဘာသာဝင် ကူကီး အသိုက်အဝန်းများအကြား တိုက်ခိုက်မှုများသည် ၁၈ လကျော်လာပြီဖြစ်ကာ ပြည်နယ်ကို လူမျိုးစုနယ်မြေများအဖြစ် ကွဲပြားသွားစေခဲ့သည်။

ရုပ်အလေ-ာင်းများသည် ကသည်းအသိုက်အဝန်းမှဖြစ်ပြီး ပြီးခဲ့သည့် သီတင်းပတ်က မဏိပူရ ရဲတပ်ဖွဲ့နှင် ကူကီး သောင်းကျန်းသူများအကြား တိုက်ပွဲဖြစ်ခဲ့ပြီးနောက် ဂျီရီဘမ်ခရိုင်တွင် ၎င်းတို့ ပျောက်ဆုံးသွားခဲ့ခြင်းဖြစ်သည်။

နိုဝင်ဘာ ၁၅ ရက်တွင် ဂျီရီဘမ်ရှိ မြစ်တစ်ခုအတွင်းမှ အလေ-ာင်းသုံးလေ-ာင်းကို ဆယ်ယူရရှိခဲ့ပြီး နောက်သုံးလေ-ာင်းကို နိုဝင်ဘာ ၁၆ ရက်တွင် တွေ့ရှိခဲ့သည်ဟု ဒေသတွင်းမီဒီယာများက သတင်း ဖော်ပြသည်။

အလေ-ာင်းများတွေ့ရှိခဲ့မှု သတင်းကြောင့် ဒေါသထွက်နေသော လူအုပ်များသည် ဒေသတွင်းရှိ နိုင်ငံရေးသမား ခုနစ်ဦး၏ နေအိမ်များကို တိုက်ခိုက်ခဲ့ကြသည်။ ယင်းတိုက်ခိုက်မှုတွင် အသေးစားပျက်စီးမှုသာ ဖြစ်ခဲ့သည်ဟု စစ်တပ်သတင်းရင်းမြစ်တစ်ခုက အေအက်ဖ်ပီကို ပြောကြားခဲ့သည်။

နိုဝင်ဘာလ ၁၆ ရက်တွင် ဆန္ဒပြသူများသည် ပြည်နယ်မြို့တော် အင်ဖာရှိ လမ်းများ၊ ကားတာယာများကို မီးရှို့ကာ ပိတ်ဆို့မှုလုပ်ခဲ့ကြသည်။

ဖြစ်ပေါ်လာသော တရားဥပဒေစိုးမိုးရေးနှင့် လုံခြုံရေးဆိုင်ရာ အခြေအနေကြောင့် မြို့၏ တစ်စိတ်တစ်ပိုင်းတွင် နေဝင်မီးငြိမ်းအမိန့် ထုတ်ပြန်လိုက်ကြောင်း မဏိပူရ ပြည်နယ်အစိုးရက ကြေညာခဲ့သည်။

ထို့အပြင် လက်ရှိဖြစ်ပေါ်လာသော မငြိမ်မသက်မှုများကို ထိန်းချုပ်နိုင်ရန်အလို့ငှာ မဏိပူရပြည်နယ်တွင် အင်တာနက်နှင့် မိုဘိုင်းလ်အချက်အလက် ဝန်ဆောင်မှုအားလုံးကို နှစ်ရက်ကြာပိတ်ထားရန်လည်း ပြည်နယ် ပြည်ထဲရေးဝန်ကြီးဌာနက အမိန့်ထုတ်ခဲ့သည်။

Ref: သည်စထရိတ်တိုင်းမ်စ်