အမေရိကန် စစ်ဖက်ဆိုင်ရာကဏ္ဍအနေဖြင့် ဒေါ်နယ်ထရမ့် ကျမ်းသစ္စာကျိန်ဆိုခြင်းမပြုမီတွင်ပင်တတိယကမ္ဘာစစ်ဖြစ်လာစေရေးကို ကြိုးပမ်းနေပုံရကြောင်း သားဖြစ်သူ ဒေါ်နယ်ထရမ့်ဂျူနီယာကသူ၏ X လူမှုကွန်ရက်အကောင့်တွင် ရေးသားဖော်ပြခဲ့သည်။
“ကျွန်တော့်အဖေက ငြိမ်းချမ်းရေးနဲ့ အသက်တွေကို ကယ်တင်ဖို့ အခွင့်အရေး မရသေးခင် တတိယကမ္ဘာစစ်ကို ဖြစ်လာစေချင်ပုံရတယ်” ဟု ရုရှားသို့ နက်ရှိုင်းစွာ ဝင်ရောက်တိုက်ခိုက်ရန် အမေရိကန် တာဝေးပစ် ဒုံးကျည်များ အသုံးပြုခြင်းအပေါ် အမေရိကန် သမ္မတ ဂျိုးဘိုင်ဒင်၏ ခွင့်ပြုချက်နှင့် ပတ်သက်၍ သူကမှတ်ချက်ပေး ပြောကြားခဲ့ပါသည်။
“အသက်တွေဟာ တန်ဖိုးမဲ့တဲ့ အရာတွေမဟုတ်ဘူး။ အဖိုးအတန်ဆုံး”ဟုလည်း သူကဆိုသည်။
အမေရိကန်သမ္မတ ဂျိုးဘိုင်ဒင်သည် ရုရှားနိုင်ငံအတွင်း တိုက်ခိုက်မှုအတွက် Army Tactical Missile Systems သို့မဟုတ် ATACMS ဟု လူသိများသော အမေရိကန်မှ ထောက်ပံ့ပေးသည့် တာဝေးပစ်ဒုံးကျည်များကို ယူကရိန်းအား အသုံးပြုခွင့်ပြုခဲ့ကြောင်း New York Times က နိုဝင်ဘာ ၁၇ ရက်တွင် ဖော်ပြခဲ့သည်။
ထိုနေ့နှောင်းပိုင်းတွင်ပင် ပြင်သစ်နှင့် ဗြိတိန်တို့ကလည်း ဘိုင်ဒင်၏ ဦးဆောင်မှုကို လိုက်နာခဲ့ပြီး ရုရှားနိုင်ငံအတွင်း၌ ၎င်းတို့၏လက်နက်များကို အသုံးပြုတိုက်ခိုက်ရန် ခွင့်ပြုခဲ့ကြောင်း ပြင်သစ်မှ Le Figaro သတင်းဌာနက ရေးသားခဲ့သည်။