ဝန်ကြီးဌာနအချို့၏ ယခင်ဘဏ္ဍာရေးနှစ် ပိုလျှံငွေများကို ရာဂီမုန်တိုင်းနောက်ဆက်တွဲလုပ်ငန်းများ၌ အမြန်ဆုံးဖြည့်ဆည်းသွားမည်

ဝန်ကြီးဌာနများနှင့်အဖွဲ့အစည်းများအနေဖြင့် မလိုအပ်သည့်အသုံးစရိတ်များ မသုံးစွဲမိစေရေးနှင့်ပတ်သက်၍ ဘဏ္ဍာရေးဆိုင်ရာကော်မရှင် ဒု-ဥက္ကဋ္ဌ၊ နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းမှ ယမန်နေ့ နိုဝင်ဘာ ၂၀ ရက်မွန်းလွဲပိုင်းကပြုလုပ်သည့် ၂၀၂၄-၂၀၂၅ ဘဏ္ဍာရေးနှစ်၊ ပြည်ထောင်စု၏ ဖြည့်စွက်ခွင့်ပြုငွေစာရင်းများတင်ပြခြင်းဆိုင်ရာ ညှိနှိုင်းအစည်းအဝေးတွင် ထည့်သွင်းပြောကြားခဲ့သည်။

ဒု-ဗိုလ်ချုပ်မှူးကြီးစိုးဝင်းက သက်ဆိုင်ရာဝန်ကြီးဌာနများနှင့် အဖွဲ့အစည်းများအနေဖြင့် မလိုအပ်သည့် အသုံးစရိတ်များ မသုံးစွဲမိစေရေး စိစစ်ကြရန် လိုအပ်သည်ကိုမှာကြားပြီး ၂၀၂၄-၂၀၂၅ ဘဏ္ဍာရေးနှစ် မူလခန့်မှန်းခြေနှင့် ပြုပြင်ပြီးခန့်မှန်းခြေ ရငွေ၊ သုံးငွေ ငွေစာရင်းများကို ရှင်းလင်းပြောကြားသည်။

ထို့ပြင် ရငွေပိုင်းတွင် တိုးမြှင့်ရရှိနိုင်ရန်လျာထား၍ ရငွေတိုးမြှင့်အောင် ဆောင်ရွက်နိုင်သည့် ဝန်ကြီးဌာနများမှလည်း နောင်ဘဏ္ဍာရေးနှစ်များတွင် ယခုထက် ဝင်ငွေပိုမိုရရှိအောင် ကြိုးပမ်းဆောင်ရွက်ကြရန်လိုအပ်သည်ဟု ပြောသည်။

အလားတူ သုံးငွေပိုင်းတွင် ယခင်နှစ်က ဝန်ကြီးဌာနများမှမသုံးနိုင်သည့်ပိုလျှံငွေများအား ပြန်လည်အပ်နှံသည်ကိုတွေ့ရှိရ၍ ဝန်ကြီးဌာနများအနေဖြင့် ကျန်ရှိသည့်(၄)လနှင့် ယခုဘဏ္ဍာနှစ်အတွင်း လုပ်ငန်းများပြီးစီးအောင်သုံးစွဲရမည့်အသုံးစရိတ်၊ လုပ်ငန်းပြီးစီးမှုအပေါ် စိစစ်မှသာ အသုံးစရိတ်များထပ်မံလျော့ချနိုင်မည်ဖြစ်ပြီး ရရှိလာသည့်ပိုလျှံငွေများကို ရာဂီမုန်တိုင်းနောက်ဆက်တွဲလုပ်ငန်းများတွင် အမြန်ဆုံးဖြည့်ဆည်းဆောင်ရွက်သွားမည်ဟု ဒု-ဗိုလ်ချုပ်မှူးကြီးစိုးဝင်း ပြောသည်။

ထို့ကြောင့် ပြည်ထောင်စုဝန်ကြီးဌာန၊ အဖွဲ့အ စည်းများ၏ ၂၀၂၄-၂၀၂၅ ဘဏ္ဍာရေးနှစ်၊ ဖြည့်စွက်ခွင့်ပြုငွေစာရင်းများကို ပြည်ထောင်စုနှင့် တိုင်း(သို့)ပြည်နယ်များ၏ အရအသုံးခန့်မှန်းခြေငွေစာရင်းများကြိုတင်စိစစ်ရေးကော်မတီ၏ စိစစ်ပြီးအခြေအနေအပေါ် ရငွေနှင့်အသုံးစရိတ်များ တိုးမြှင့်လိုခြင်း၊ စိစစ်လျှော့ချလိုခြင်းများရှိပါက တင်ပြပေးကြရမည်ဟု ဒု-ဗိုလ်ချုပ်မှူးကြီးစိုးဝင်းက ပြောကြားခဲ့သည်။