မြေမြှုပ်မိုင်းနှင့် ပေါက်ကွဲစေတတ်သည့် လက်နက်ပစ္စည်းများကြောင့် ထိခိုက်သေဆုံးသူဦးရေသည် မြန်မာနိုင်ငံက အများဆုံးဖြစ်လာကြောင်း နိုင်ငံတကာ မြေမြှုပ်မိုင်းသုံးစွဲမှု ပပျောက်ရေးလှုပ်ရှားမှုအဖွဲ့ (International Campaign to Ban Landmines – ICBL) ၏ နိုဝင်ဘာ (၂၀) ရက်ထုတ်ပြန်သည့် အစီရင်ခံစာတွင် ဖော်ပြထားသည်။
အစီရင်ခံစာတွင် ၂၀၂၃ ခုနှစ်အတွင်း မြန်မာနိုင်ငံ၌ မြေမြှုပ်မိုင်းနှင့် ပေါက်ကွဲစေတတ်သည့် လက်နက်ပစ္စည်းကြောင့် လူတစ်ထောင်ကျော် (၁,၀၀၃ ဦး) သေဆုံးခဲ့ကာ ပထမဆုံးအကြိမ် လူသေဆုံးမှု အများဆုံးနိုင်ငံဖြစ်ခဲ့သည်ဟု ဆိုသည်။
၂၀၂၃ ခုနှစ်အတွင်း ကမ္ဘာတစ်ဝန်း မြေမြှုပ်မိုင်းနှင့် ပေါက်ကွဲစေတတ်သည့် လက်နက်ပစ္စည်းများကြောင့် လူ ( ၅၇၅၇ ဦး) သေဆုံးခဲ့ပြီး ကိုလံဘီယာ၊ မြန်မာ၊ အိန္ဒိယ၊ ပါကစ္စတန်နှင့် ပါလက်စတိုင်းတို့တွင် အစိုးရမဟုတ်သည့် လက်နက်ကိုင် အဖွဲ့အစည်းများသည် ၂၀၂၃ ခုနှစ် နှင့် ၂၀၂၄ ခုနှစ်အတွင်း မြေမြှုပ်မိုင်းများကို ဆက်လက်အသုံးပြုနေကြကြောင်းလည်း အစီရင်ခံစာက ဖော်ပြခဲ့သည်။
အလားတူ ကုလသမဂ္ဂ ကလေးများ ရန်ပုံငွေအဖွဲ့ (UNICEF) ကလည်း မြန်မာနိုင်ငံ၌ မြေမြှုပ်မိုင်းနှင့် ပေါက်ကွဲစေတတ်သည့် စစ်လက်နက်ပစ္စည်းများကြောင့် ၂၀၂၃ ခုနှစ်တွင် အရပ်သား သေဆုံးမှုနှင့် ထိခိုက်ဒဏ်ရာရမှုသည် ၂၀၂၂ ခုနှစ်ထက် သုံးဆနီးပါး တိုးလာကြောင်းလည်း ဖော်ပြခဲ့သည်ကို တွေ့ရှိရသည်။