ယနေ့ နိုဝင်ဘာ ၂၁ ရက်နံနက်ပိုင်းက မြန်မာနိုင်ငံအင်ဂျင်နီယာပညာရေးနှစ်(၁၀၀)ပြည့်ရာပြည့်သဘင်နှင့် Naypyitaw State Polytechnic University ဖွင့်ပွဲအခမ်းအနား ကျင်းပခဲ့ရာ နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင် တက်ရောက်၍ ဂုဏ်ပြုအမှာစကားပြောကြားခဲ့သည်။
ဗိုလ်ချုပ်မှူးကြီး မင်းအောင်လှိုင်က နိုင်ငံဖွံ့ဖြိုးတိုးတက်ရေးတွင်လိုအပ်သည့် အရည်အသွေးမြင့်လူ့စွမ်းအားအရင်းအမြစ်များ မွေးထုတ်ပေးနိုင်ရေး၊ နိုင်ငံတော်အတွက်လိုအပ်သည့် အင်ဂျင်နီယာပညာရှင်များပိုမိုမွေးထုတ်လေ့ကျင့်ပေးနိုင်ရေး၊ ဒေသဖွံ့ဖြိုးတိုးတက်ရေးနှင့် ပြည်သူများ၏ လူမှုစီးပွားဘဝဖွံ့ဖြိုးတိုး တက်မှုကိုအထောက်အကူပြုနိုင်ရေးရည်ရွယ်ချက်များဖြင့် နေပြည်တော်နည်းပညာတက္ကသိုလ်ကို ၂၀၂၂ ခုနှစ်၊ နိုဝင်ဘာ ၁ ရက်တွင် အစိုးရနည်းပညာကောလိပ်(နေပြည်တော်)အဖြစ်မှ တက္ကသိုလ်အဖြစ်အဆင့်တိုးမြှင့်ဖွင့်လှစ်ပေးခဲ့သည်ဟု ပြောသည်။
၂၀၂၂-၂၀၂၃ ပညာသင်နှစ်တွင် အင်ဂျင်နီယာအထူးပြုဘာသာရပ်(၆)ခုကိုသင်ကြားပေးခဲ့ပြီး ၂၀၂၃-၂၀၂၄ ပညာသင်နှစ်တွင် စိုက်ပျိုးရေးအင်ဂျင်နီယာအထူးပြုဘာသာရပ်ကိုတိုးချဲ့ဖွင့်လှစ်ခဲ့ကာ ယခု ၂၀၂၄-၂၀၂၅ ပညာသင်နှစ်တွင် နေပြည်တော်နည်းပညာတက္ကသိုလ်အား Naypyitaw State Polytechnic University အဖြစ်ပြောင်းလဲတိုးချဲ့ဖွင့်လှစ်နိုင်ခဲ့သည်ဟု ပြောသည်။
Naypyitaw State Polytechnic University အဖြစ်ပြောင်းလဲတိုးချဲ့ဖွင့်လှစ်နိုင်ခဲ့ပြီးနောက် အင်ဂျင်နီယာအထူးပြုဘာသာရပ်များအပြင် ကွန်ပျူတာသိပ္ပံနှင့် ကွန်ပျူတာနည်းပညာဘာသာရပ်များကိုပါ တိုးချဲ့ဖွင့်လှစ်သင်ကြားပေးနိုင်ခဲ့သည်ဟု ပြောသည်။
” Naypyitaw State Polytechnic University ကို ရန်ကုန်နည်းပညာတက္ကသိုလ်နဲ့ ရန်ကုန်ကွန်ပျူတာတက္ကသိုလ်တွေနည်းတူ နိုင်ငံ့ထိပ်တန်းတက္ကသိုလ်ကြီးတစ်ခုဖြစ်လာစေဖို့ရည်ရွယ်ပြီး တိုးချဲ့ဖွင့်လှစ်ပေးခဲ့ခြင်းဖြစ်ပါတယ်။ အင်ဂျင်နီယာအထူးပြုဘာသာရပ်ဌာန(၇)ခု၊ ကွန်ပျူတာအထူးပြုဘာသာရပ်ဌာန(၄)ခု၊ တခြားအထောက်အကူပြုဘာသာရပ်ဌာန(၅)ခု၊ သင်ကြားရေးဌာနစုစု ပေါင်း(၁၆)ခုနဲ့ ပြည့်စုံအောင်တိုးမြှင့်ဖွင့်လှစ်ပေးခဲ့ပါတယ်”ဟု နစက ဥက္ကဋ္ဌကပြောသည်။
ထို့ပြင် အင်ဂျင်နီယာအထူးပြုဘွဲ့(၇)မျိုးနှင့် ကွန်ပျူတာအထူးပြုဘွဲ့ (၂)မျိုး(စုစုပေါင်းဘွဲ့ ၉ မျိုး) ကို အပ်နှင်းသွားမည်ဖြစ်ကာ တစ်နှစ်လျှင်အင်ဂျင်နီယာအထူးပြုကျောင်းသား(၂၇၀)ဦး၊ ကွန်ပျူတာအထူးပြုကျောင်းသား(၁၂၀)ဦး(စုစုပေါင်း ၃၉၀ ဦး)ခေါ်ယူသွားမည်ဖြစ်ပြီး အင်ဂျင်နီယာအထူးပြုဘာသာရပ်အား စာသင်နှစ်(၅) နှစ်၊ ကွန်ပျူတာအထူးပြုဘာသာရပ်အား စာသင်နှစ်(၄)နှစ်စီ သင်ကြားပို့ချပေးသွားမည်ဟု ပြောသည်။
ထို့အတူ Naypyitaw State Polytechnic University အား Smart University ဖြစ်လာစေရေး၊ နိုင်ငံတကာပိုလီတက္ကနစ်တက္ကသိုလ်များ နည်းတူ အထူးပြုနယ်ပယ်ပေါင်းစုံနှင့် ဘွဲ့လွန်ဒီဂရီသင်တန်းများကိုပါ တိုးမြှင့်ဖွင့်လှစ်နိုင်ရေး၊ နိုင်ငံ့အကျိုးပြုသုတေသနလုပ်ငန်းများ ဆောင်ရွက်နိုင်ရေးတို့အတွက် အဆင့်ဆင့်ဆက်လက်ဆောင်ရွက်သွားမည်ဟု နစက ဥက္ကဋ္ဌကပြောကြားခဲ့သည်။