မကွေးတိုင်း ဒေသကြီးအတွင်း၌ စပါးသီးနှံ စိုက်ပျိုးထုတ်လုပ်မှု တိုးတက်မြင့်မားရေး၊ စပါးသီးနှံ စိုက်ပျိုးရာတွင်စိုက်ပျိုးနည်းစနစ်မှန်ကန်စေရေးနှင့် စပါးတစ်ဧက အထွက်နှုန်း တိုးတက်ရရှိရေး တောင်သူများထံ Manual Drum Seeder Type II အမျိုးအစား လက်ဆွဲမျိုးစေ့ချ ကိရိယာ Drum Seeder အလက်(၅၀၀)ကို နွေစပါးစိုက်ပျိုးချိန်ရာသီအမှီဖြန့်ဖြူးပေးသွားမည်ဖြစ်ကြောင်း မကွေးတိုင်းဒေသကြီး စိုက်ပျိုးရေးဦးစီးဌာနမှ သိရသည်။
ဒေသခံတောင်သူများ စပါးသီးနှံ စိုက်ပျိုးထုတ်လုပ်ရာတွင် စိုက်ပျိုးနည်းစနစ် မှန်ကန်စေပြီး တစ်ဧက အထွက်နှုန်း တိုးတက်စေရေး ၂၀၂၄-၂၀၂၅ ဘဏ္ဍာနှစ် တိုင်းဒေသကြီးအစိုးရအဖွဲ့မှ တပ်မတော်အကြီးစားစက်ရုံ(ဆင်တဲ)က ထုတ်လုပ်သည့် လက်ဆွဲမျိုးစေ့ချကိရိယာ Manual Drum Seeder Type II အမျိုးအစား အလက်ပေါင်း (၅၀၀)ကို ဝယ်ယူကာ သက်ဆိုင်ရာ စိုက်ပျိုးရေးဦးစီးဌာနရုံးများသို့ ဖြန့်ဖြူးပေးထားပြီး ဒေသခံတောင်သူများထံ ယခုနှစ် နွေစပါးစိုက်ပျိုးချိန်ရာသီအမှီ ဖြန့်ဖြူးပေးအပ်သွားမည်ဖြစ်ကြောင်း သိရသည်။
မကွေးတိုင်းဒေသကြီးအတွင်းရှိ ခရိုင်နှင့် မြို့နယ်များအလိုက် လက်ဆွဲမျိုးစေ့ချ ကိရိယာ ဖြန့်ဖြူးပေးရာတွင် မကွေးခရိုင်၊ နတ်မောက်မြို့နယ်၌ (၂၅)လက်၊ မြို့သစ်မြို့နယ်၌ (၇၆) လက်၊ တောင်တွင်းကြီးမြို့နယ်၌ (၈၆)လက်၊ မင်းဘူးခရိုင်၊ မင်းဘူး(စကု)မြို့နယ်၌ (၄၁)လက်၊ ပွင့်ဖြူမြို့နယ်၌ (၈၆)လက်၊ စလင်းမြို့နယ်၌ (၅၁)လက်၊ စေတုတ္တရာမြို့နယ်၌ (၄) လက်၊ ငဖဲမြို့နယ်၌ (၉)လက်၊ သရက်ခရိုင်၊ သရက်မြို့နယ် ၌ (၁၄)လက်၊ မင်းတုန်းမြို့နယ်၌ (၁၅)လက်၊ မင်းလှမြို့နယ် ၌ (၁၀)လက်၊ ကံမမြို့နယ်၌ (၂၂)လက်၊ အောင်လံခရိုင်၊ အောင်လံမြို့နယ်၌ (၄၆)လက်နှင့် ဆင်ပေါင်ဝဲမြို့နယ်၌(၁၅) လက် စုစုပေါင်း အလက်(၅၀၀)ကိုဖြစ်ကြောင်း သိရသည်။
မကွေးတိုင်းဒေသကြီးအတွင်း၌ ၂၀၂၄-၂၀၂၅ စိုက်ပျိုးရာသီတွင် ယခုနှစ် မိုးစပါးကို ဧကပေါင်း (၆၃၀၃၇၉) ဧကအထိ စိုက်ပျိုးနိုင်ခဲ့ပြီး ယခုနှစ် နွေစပါးစိုက်ပျိုးရာသီတွင် ဧကပေါင်း (၅၆၂၀၅) ဧက စိုက်ပျိုးရန် လျာထားဆောင်ရွက်လျက်ရှိကြောင်း မကွေးတိုင်းဒေသကြီး စိုက်ပျိုးရေးဦးစီး ဌာနမှ သိရသည်။