တပ်မတော်၊ ရဲတပ်ဖွဲ့နှင့်လူပုဂ္ဂိုလ်များကို ဂုဏ်ထူးဆောင်ဘွဲ့များနှင့် ဂုဏ်ထူးဆောင်တံဆိပ်များပေးအပ်ချီးမြှင့်

နစက ဥက္ကဋ္ဌမှ နိုင်ငံတော်ကာကွယ်ရေးနှင့်လုံခြုံရေးတာဝန်များကို စွမ်းစွမ်းတမံထမ်းဆောင်ခဲ့သည့် တပ်မတော်၊ ရဲတပ်ဖွဲ့နှင့်လူပုဂ္ဂိုလ်များကို ဂုဏ်ထူးဆောင်ဘွဲ့နှင့် ဂုဏ်ထူးဆောင်တံဆိပ်များပေးအပ်ချီးမြှင့်ခဲ့ကြောင်း အမိန့်ကြော်ငြာစာအမှတ် ၁၉၂/၂၀၂၄ ဖြင့် ယနေ့ နိုဝင်ဘာ ၂၅ ရက်က ထုတ်ပြန်ခဲ့သည်။

တပ်မတော်ဆိုင်ရာ စွမ်းရည်သတ္တိဂုဏ်ထူးဆောင်ဘွဲ့ဖြစ်သည့် သူရဘွဲ့အား ကာကွယ်ရေးဝန်ကြီးဌာနမှ ဗိုလ်မှူးကြီး ဝဏ္ဏလှိုင်၊ ဗိုလ်မှူးကြီး သက်ထွန်းအောင်၊ ဗိုလ်မှူး မျိုးကိုကိုထွန်းနှင့် ဗိုလ်မှူး အောင်ဆန်းဦးတို့အား ပေးအပ်ချီးမြှင့်ခဲ့သည်။

ထို့ပြင် တပ်မတော်ဆိုင်ရာ စွမ်းရည်သတ္တိဂုဏ်ထူးဆောင်တံဆိပ်ဖြစ်သည့် သူရဲကောင်းမှတ်တမ်းဝင်တံဆိပ်အား ကာကွယ်ရေးဝန်ကြီးဌာနမှ (၂၆)ဦးကို ပေးအပ်ချီးမြှင့်ခဲ့သည်။

ထို့အတူ မြန်မာနိုင်ငံရဲတပ်ဖွဲ့ဆိုင်ရာ စွမ်းရည်သတ္တိဂုဏ်ထူးဆောင်တံဆိပ်ဖြစ်သည့် ရဲသူရတံဆိပ်အား မြန်မာနိုင်ငံရဲတပ်ဖွဲ့မှ (၅)ဦးနှင့် မီးသတ်ဦးစီးဌာနမှ (၂)ဦး(စုစုပေါင်း(၇)ဦးကို ပေးအပ်ချီးမြှင့်ခဲ့သည်။

ထို့ပြင် ရဲဗလတံဆိပ်အား မြန်မာနိုင်ငံရဲတပ်ဖွဲ့၊ မီးသတ်ဦးစီးဌာန၊ ကာကွယ်ရေးဝန်ကြီးဌာန၊ ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ရန်ကုန်တိုင်း၊ ကယားပြည်နယ်၊ စစ်ကိုင်းတိုင်း၊ မန္တလေးတိုင်း၊ တနင်္သာရီတိုင်း၊ မကွေးတိုင်း၊ မွန်ပြည်နယ်တို့မှ (၆၁)ဦးကို ပေးအပ်ချီးမြှင့်ခဲ့သည်။

ထိုသို့ ဂုဏ်ထူးဆောင်ဘွဲ့နှင့် ဂုဏ်ထူးဆောင်တံဆိပ်များပေးအပ်ချီးမြှင့်ကြောင်း အမိန့်ကြော်ငြာစာအား နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်မှ လက်မှတ်ရေးထိုးထုတ်ပြန်ခဲ့ခြင်းဖြစ်သည်။