ရှမ်းပြည်နယ်အတွင်းရှိ တိုင်းရင်းသားလက်နက်ကိုင်အဖွဲ့ ၂ ဖွဲ့ဖြစ်သည့် ရှမ်းပြည်တိုးတက်ရေးပါတီ/ရှမ်းပြည်တပ်မတော် (SSPP/SSA)နှင့် ရှမ်းပြည်ပြန်လည်ထူထောင်ရေးကောင်စီ (RCSS/SSA)တို့ ယမန်နေ့ နိုဝင်ဘာ ၂၅ ရက် နံနက်အစောပိုင်းက တိုက်ပွဲများပြန်လည်ဖြစ်ပွားခဲ့ကြောင်း သိရသည်။
ယမန်နေ့က ရှမ်းပြည်နယ် တောင်ပိုင်း မိုင်းကိုင်မြို့၊ တုံလောကျေးရွာအုပ်စု၊ ပန်ပွဲကျေးရွာအနီးရှိ SSPP/SSA တပ်စခန်းငယ်နှစ်ခုကို RCSS/SSA အဖွဲ့ အင်အား ၁၀၀ ကျော်က စစ်ကြောင်း သုံးကြောင်းခွဲ၍ ဝင်ရောက်တိုက်ခိုက်ခဲ့သည်ဟု SSPP/SSAက အသိပေးထုတ်ပြန်ထားသည်။
တိုက်ပွဲအတွင်း SSPP/SSA တပ်ဖွဲ့ဝင် ၈ ဦးဖမ်းဆီးခံခဲ့ရပြီး စခန်းတွင်းရှိ ဆိုင်ကယ် ၄ စီး၊ မော်တော်ယာဉ် တစ်စီးတို့ကို မီးရှို့ဖျက်ဆီးခံခဲ့ရသည်ဟု ဆိုသည်။
ထို့အပြင် RCSS/SSA အဖွဲ့များက ဒေသတွင်းရှိ လူနေအိမ်အချို့ကိုလည်း ဝင်ရောက်ရှာဖွေခဲ့သလို ကျေးရွာကော်မတီဝင်တစ်ဦးသည်လည်း ပ-စ်ခတ်ခံရမှုကြောင့် ေ-သဆုံးခဲ့ရသည်ဟု ဆိုသည်။
SSPP/SSA ၏ အသိပေးထုတ်ပြန်မှုတွင် ၎င်းတို့ ရှမ်းတပ် နှစ်ဖွဲ့ အပစ်ရပ်၍ ပေါင်းစည်းနိုင်ရန် နှစ်ဖက်တပ် တွေ့ဆုံ ညှိနှိုင်းရေးလုပ်ဆောင်နေစဥ်ကာလဖြစ်ကြောင်း၊ တပ်နှစ်ဖွဲ့ပေါင်းစည်းနိုင်ရေးအတွက် နှစ်ဖက်တိုက်ပွဲများမဖြစ်ပွားစေရန် ထိန်းသိမ်းခဲ့ခြင်းကို RCSS တပ်ဖွဲ့မှ အခွင့်ကောင်းအဖြစ် အသုံးချကာ တိုက်ခိုက်လာခြင်းဖြစ်သည်ဟု ဖော်ပြထားသည်။
ရှမ်းတပ်ဖွဲ့ နှစ်ခု တိုက်ပွဲဖြစ်ပွားခဲ့ခြင်းအပေါ် RCSS/SSA ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေးထံ ပေါ်ပြူ လာနယူးစ်က ဆက်သွယ်မေးမြန်းရန် ကြိုးစားနေဆဲဖြစ်သည်။
RCSS/SSA အဖွဲ့သည် လက်ရှိ တပ်မတော်နှင့်ဆက်ဆံကောင်းများ တည်ဆောက်ထားနိုင်သည့် ရှမ်းလက်နက်ကိုင်အဖွဲ့တစ်ခုဖြစ်ကာ တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် အဖွဲ့တစ်ဖွဲ့ဖြစ်သည်။