အာဖဂန်ပြန်လည်တည်ဆောက်ရေး အမေရိက ကူညီသင့်–ရုရှား

ရုရှား၏ သြဇာကြီးမားသော လုံခြုံရေးကောင်စီအတွင်းရေးမှူး ဆာဂီရှိုဂူက မော်စကိုသည် အာဖဂန်တွင် ရေရှည်ငြိမ်းချမ်းရေးရရှိရေးအတွက် အကူအညီပေးလိုသည်ဟု အာဖဂန်နစ္စတန်၏ တာလီဘန်ခေါင်းဆောင်များကို တနင်္လာနေ့တွင် ပြောကြားခဲ့ကြောင်း ရုရှားသတင်းဌာနများကရေးသား ဖော်ပြကြသည်။

အာဖဂန်တွင် နှစ်ပေါင်းများစွာ စစ်ရေးပါဝင်ပတ်သက်မှုရှိခဲ့သော အမေရိက အနေဖြင့် အာဖဂန်နစ္စတန်ပြန်လည်တည်ဆောက်ရေးတွင် ဦးဆောင်အခန်းကဏ္ဍမှ ပါဝင်သင့်သည်ဟုလည်း ကာကွယ်ရေးဝန်ကြီးဟောင်းဖြစ်သည့် ရှိုဂူက ပြောကြားလိုက်သည်။

ကဘူးလ်အစိုးရကို အမေရိက၏ ပိတ်ဆို့ဒဏ်ခတ်မှု ဖိအားများမှ ပြေလျော့စေရေးအတွက် ၎င်းတို့ကို ကူညီရန် တာလီဘန်ခေါင်းဆောင်များက တောင်းဆိုခဲ့သည်ဟု ရုရှားသတင်းဌာနများက ဆိုခဲ့သည်။

ရှိုဂူခေါင်းဆောင်သော ရုရှားကိုယ်စားလှယ်အဖွဲ့သည် မြို့တော်ကဘူးလ်တွင် အာဖဂန်ဒုတိယဝန်ကြီးချုပ်များ၊ ကာကွယ်ရေးဝန်ကြီး၊ ပြည်ထဲရေးဝန်ကြီးအပါအဝင် အစိုးရအကြီးတန်းအရာရှိများနှင့် ဆွေးနွေးမှုများလုပ်ခဲ့သည်။

မိမိတို့ နှစ်နိုင်ငံအကြား အပြုသဘောဆောင်သော နိုင်ငံရေးဆွေးနွေးပွဲများ ထူထောင်ရေး အသင့်ရှိနေသည်ကို အတည်ပြုလိုကြောင်းနှင့် ရည်မှန်းချက်များသည် အာဖဂန်နိုင်ငံသားများအကြား ရန်ပြေငြိမ်းရေးလုပ်ငန်းစဉ်အတွက် တွန်းအားဖြစ်စေလိမ့်မည်ဖြစ်ကြောင်း သူက ပြောဆိုခဲ့သည်ဟု သတင်းများတွင် ဖော်ပြသည်။

၂၀၂၂ ခုနှစ်တွင် ရုရှားက ယူကရိန်းကို ကျူးကျော်ခဲ့ပြီးနောက် သမ္မတဗလာဒီမာ ပူတင်သည် အာရှနှင့် အနောက်ကမ္ဘာမဟုတ်သော နိုင်ငံများနှင့် ဆက်ဆံရေးတိုးမြှင့်ရန် ဦးတည်လာခဲ့သည်။

အမေရိက,က အာရှတွင် တာတိုနှင့် တာလတ်ပစ် ဒုံးကျည်များ ဖြန့်ကျက်လာခဲ့ပါက ရုရှားသည်လည်း အလားတူလုပ်ဆောင်သွားရန စဉ်းစားမည်ဖြစ်သည်ဟု တနင်္လာနေ့တွင် မော်စကိုက ပြောဆိုခဲ့သည်။

Ref: တီဘီအက်စ်နူးစ်