မိသားစုလွှဲပို့ငွေ အထောက်ထားများကို လကုန်ပြီး (၅)ရက်အတွင်း ပေးပို့ရမည် ဖြစ်ကြောင်းဆို

ပြည်ပရောက်အလုပ်သမားများ၏ မိသားစုလွှဲပို့ငွေ အထောက်ထားများကို အထောက်အထား ရရှိသည်ဖြစ်စေ၊ မရှိသည်ဖြစ်စေ လကုန်ပြီး (၅) ရက်အတွင်း မပျက်မကွက် ပုံမှန်ပေးပို့ရန် အလုပ်သမားညွှန်ကြားရေးဦးစီးဌာနက ထုတ်ပြန်သည်။

လက်ရှိတွင် စေလွှတ်လချုပ်စာရင်းများ ပေးပို့ရန် ကျန်ရှိနေသည့် အေဂျင်စီ (၂၀၀)ကျော်ခန့်ရှိနေဆဲဖြစ်ပြီး ပေးပို့ရန် ကျန်ရှိနေသည့် အေဂျင်စီများအနေဖြင့်လည်း အမြန်ဆုံးပေးပိူ့ရန် အလုပ်သမားညွှန်ကြားရေး ဦးစီးဌာနက ဆိုသည်။

လက်ရှိတွင် အလုပ်သမားညွှန်ကြားရေးဦးစီးဌာနအနေဖြင့် မိသားစုလွှဲပို့ငွေ အထောက်အထား တင်ပြနိုင်ခြင်း မရှိသည့် ပြည်ပအလုပ်အကိုင် ရှာဖွေရေး အေဂျင်စီများကို အရေးယူနေကာ အချိန်မီ ပေးပို့ခြင်းမရှိပါက ဒဏ်ကြေးပေးဆောင်ရမယ့်အပြင် အလုပ်ခေါ်စာ (Demand Letter) အသစ် တင်ပြခွင့် ဆိုင်းငံ့ခံရမည် ဖြစ်ကြောင်းလည်း ပြောသည်။

အေဂျင်စီမှ စေလွှတ်ခဲ့သည့် အလုပ်သမားများအနေဖြင့် လုပ်ခလစာ၏ အနည်းဆုံး ၂၅% အား (၁)လလျှင်တစ်ကြိမ် သို့ မဟုတ် (၃)လလျှင် (၁)ကြိမ် တရားဝင်ငွေလွှဲလမ်းကြောင်းမှ လွှဲပြောင်းခြင်းမရှိပါက အရေးယူဆောင်ရွက်သွားမည်ဖြစ်ကြောင်း အလုပ်သမားဝန်ကြီးဌာနက အသိပေးကြေညာထားပြီး ဖြစ်သည်။

ထို့ကြောင့် ပြည်ပရောက်အလုပ်သမားများ၏ မိသားစုလွှဲပို့ငွေအထောက်အထားတင်ပြနိုင်ခြင်း မရှိသည့် အေဂျင်စီများကို ပြည်ပကို အလုပ်သမားစေလွှတ်ရေးလုပ်ငန်းစဉ်များ ဆိုင်းငံ့ခြင်း၊ အလုပ်ခေါ်စာ အသစ်တင်ခွင့် ဆိုင်းငံ့ခြင်းနှင့် ဒဏ်ကြေးငွေ ပေးဆောင်ခိုင်းခြင်း စသည့် အရေးယူမှုများ ဆောင်ရွက်နေသည်။

အရေးယူခံရသည့် အေဂျင်စီများ အနေဖြင့် အလုပ်သမားများ၏ မိသားစုလွှဲပို့ငွေစာရင်း အထောက်အထား တင်ပြနိုင်မှု ရာခိုင်နှုန်းပြည့်မီလျှင် စေလွှတ်ရေးလုပ်ငန်းစဉ်နှင့် အလု ပ်ခေါ်စာ အသစ်တင်ပြခွင့်ကို ဆက်လက်ခွင့်ပြု ပေးသွားမည် ဖြစ်ကြောင်းလည်း သိရသည်။

ထိုနည်းတူ ပြည်ပကို သွားရောက် အလုပ်လုပ်ကိုင်မည့်သူများအနေဖြင့်လည်း ပြည်ပအလုပ်အကိုင်သက်သေခံကတ် (OWIC) လျှောက်သည့်အခါ သက်ဆိုင်ရာနိုင်ငံဆီသွားမည့် လေယာဥ်လက်မှတ်ပြနိုင်မှသာ လက်ခံတော့မည်ဖြစ်ကြောင်းလည်း အလုပ်သမားညွန်ကြားရေးဦးစီးဌာနက ထုတ်ပြန်ထားသည်။