နိုင်ငံအတွင်းတည်ငြိမ်အေးချမ်းမှုပျက်ပြားအောင်လုပ်ဆောင်နေခြင်းများသည် လူ့အခွင့်အရေးများကိုပျက်ပြားအောင်ဖျက်ဆီးနေခြင်းပင်ဖြစ်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ဒီဇင်ဘာ ၁၀ ရက်နံနက်ပိုင်းတွင် ကျင်းပခဲ့သည့် (၇၆)နှစ်မြောက် အပြည်ပြည်ဆိုင်ရာ လူ့အခွင့်အရေးနေ့အခမ်းအနား၌ အမှာစကားပြောကြားစဉ် ထည့်သွင်းပြောကြားခဲ့သည်။
နစကဥက္ကဋ္ဌက နိုင်ငံတစ်နိုင်ငံ တည်ငြိမ်အေးချမ်းပြီးဖွံ့ဖြိုးတိုးတက်ရန် တိုင်းရင်းသားပြည်သူများကြား လူ့အခွင့်အရေးများကို ရရှိခံစားစောင့်ထိန်းလိုက်နာကြရန်လိုသည်ဟု ပြောသည်။
နိုင်ငံအတွင်း တည်ငြိမ်အေးချမ်းမှုပျက်ပြားအောင်လုပ်ဆောင်နေခြင်းများသည် တိုင်းရင်းသားပြည်သူများရရှိမည့် လွတ်လပ်ခွင့်နှင့်လူ့အခွင့်အရေးများကို ပျက်ပြားအောင်ဖျက်ဆီးနေခြင်းပင်ဖြစ်သည်ဟု ပြောသည်။
ထို့ကြောင့် တိုင်းရင်းသားပြည်သူများသည် ၎င်းတို့၏ လူ့အခွင့်အရေးများကို တန်းတူရရှိရန်နှင့် လက်နက်ကိုင်အကြမ်းဖက်သည့်နည်းလမ်းများဖြင့်ချိုးဖောက်ခြင်းခံနေရမှုများကို စည်လုံးညီညွတ်စွာ လက်တွဲဆန့်ကျင်တိုက်ဖျက်သွားကြရမည်ဟု တိုက်တွန်းမှာကြားခဲ့သည်။
ထို့ပြင် နိုင်ငံတော်အစိုးရအနေဖြင့် ပြည်သူအားလုံး၏ အခွင့်အရေးများတန်းတူညီမျှရန် ပြည်တွင်းငြိမ်းချမ်းရေး အစွမ်းကုန်ကြိုးပမ်းဆောင်ရွက်နေသည့်အတွက် တိုင်းရင်းသားပြည်သူ တစ်ရပ်လုံးမှ နိုင်ငံတော်အစိုးရနှင့်အတူ လက်တွဲပူးပေါင်းဆောင်ရွက်သွားကြရန်လည်း နစက ဥက္ကဋ္ဌက တိုက်တွန်းမှာကြားခဲ့သည်။