ပြည်ပအလုပ်အကိုင်ရှာဖွေရေး အေဂျင်စီများအနေဖြင့် နိုင်ငံအလိုက် စေလွှတ်ထားသည့် အလုပ်သမားများထံမှ ပြည်တွင်းသို့ ငွေပြန်လွှဲခြင်း၊ မရှိကို အလုပ်သမားဝန်ကြီးဌာနက စစ်ဆေးမည်ဖြစ်ကြောင်း အေဂျင်စီများက ပြောသည်။
ယင်းသိူ့စစ်ဆေးခြင်းကို ဒီဇင်ဘာ ၁၆ ရက်နေ့ကစတင်ပြီး စစ်ဆေးမည် ဖြစ်ကာ ဒီဇင်ဘာ ၂၇ ရက်အထိ တရက်လျှင် အေဂျင်စီ ငါးဆယ်နှုန်းကို ခေါ်ယူစစ်ဆေးမည်ဟု သိရသည်။
စာရင်းများအရ ၂၀၂၄ ခုနှစ် မေလ မှ သြဂုတ်အထိ လေးလအတွင်း ပြည်ပအလုပ်အကိုင် အေဂျင်စီ ၄၂၉ ခုမှ ဂျပန်၊ ကိုရီးယား၊ စင်ကာပူ၊ မလေးရှား၊ ထိုင်း၊ လာအိုနှင့် အရှေ့အလယ်ပိုင်း နိုင်ငံတချို့ကို အလုပ်သမား ၅၆,၈၆၀ ဦး စေလွှတ်ထားကြောင်းလည်း သိရသည်။
ထိုကဲ့သို့ နိုင်ငံပြင်ပကို တရားဝင် သွားရောက်အလုပ်လုပ်ကိုင်
သူများအနေဖြင့် လုပ်ခလစာ၏ အနည်းဆုံး ၂၅ ရာခိုင်နှုန်း သို့သုံးလစာ စုစုပေါင်း၏ ၂၅ ရာခိုင်နှုန်းကို တရားဝင် ငွေလွှဲစနစ်ဖြင့် ငွေလွှဲရန်လည်း အလုပ်သမားဝန်ကြီးဌာနက ထုတ်ပြန်ထားခြင်း ဖြစ်သည်။
ထို့အပြင် ပြည်ပရောက် အလုပ်သမားများ၏ မိသားစုလွှဲပို့ငွေ အထောက်ထားများကို အထောက်အထား ရရှိသည်ဖြစ်စေ၊ မရှိသည်ဖြစ်စေ လကုန်ပြီး ၅ ရက်အတွင်း မပျက်မကွက် ပုံမှန်ပေးပို့ရန် အလုပ်သမားဝန်ကြီးဌာနက ထုတ်ပြန်ထားသည်။
လက်ရှိတွင် စေလွှတ်လချုပ်စာရင်းများ ပေးပို့ရန် ကျန်ရှိနေသည့် အေဂျင်စီ နှစ်ရာကျော်ခန့်ရှိနေဆဲ ဖြစ်ပြီး ပေးပို့ရန် ကျန်ရှိနေသည့် အေဂျင်စီများအနေဖြင့်လည်း အမြန်ဆုံးပေးပိူ့ရန်လည်း ဆိုသည်။
အလုပ်သမားဝန်ကြီးဌာနအနေဖြင့် မိသားစုလွှဲပို့ငွေ အထောက်အထား တင်ပြနိုင်ခြင်း မရှိသည့် ပြည်ပအလုပ်အကိုင် ရှာဖွေရေး အေဂျင်စီများကို အရေးယူနေကာ အချိန်မီ ပေးပို့ခြင်းမရှိပါက ဒဏ်ကြေးပေးဆောင်ရမယ့်အပြင် အလုပ်ခေါ်စာ (Demand Letter) အသစ် တင်ပြခွင့် ဆိုင်းငံ့ခံရမည် ဖြစ်ကြောင်းလည်း ထုတ်ပြန်ထားသည်။