ရုရှားရေနံတင်သင်္ဘော နှစ်ပိုင်းကျိုးပြီး ရေနံယိုဖိတ်မှုဖြစ်ပွား

ရေနံထွက်ကုန် တန်ပေါင်းထောင်နှင့်ချီ၍ တင်ဆောင်လာသည့် ရုရှားရေနံတင်သင်္ဘောတစ်စီးသည် တနင်္ဂနွေနေ့က ပြင်းထန်သော မုန်တိုင်းတိုက်ခတ်ခံသဖြင့် သင်္ဘောနှစ်ပိုင်းကျိူးကာ Kerch ရေလက်ကြားတွင် ရေနံယိုဖိတ်မှုဖြစ်ပေါ်ခဲ့ကြောင်းနှင့် အခြား ရေနံတင်သင်္ဘောတစ်စီးသည်လည်း ပျက်စီးခဲ့ပြီး ဒုက္ခကြုံခဲ့ကြောင်း ရုရှားတာဝန်ရှိသူများက ပြောဆိုသည်။

ရုရှားကုန်းမကြီးနှင့် ခရိုင်းမီးယားဒေသအကြားရှိ Kerch ရေလက်ကြားတွင် ရောက်ရှိနေခဲ့သော အဆိုပါ ရေနံတင်သင်္ဘောများသည် ဘေးဒုက္ခကြုံနေရကြောင်း သတင်းပို့ခဲ့သည်ဟု ဆိုသည်။

လူ ၁၅ ဦးလိုက်ပါခဲ့သည့် ၁၃၆ မီတာအရှည်ရှိ Volgoneft 212 ရေနံတင်သင်္ဘောသည် ဦးပိုင်းနစ်မြုပ်ကာ နှစ်ပိုင်းကျိုးပြီး လူတစ်ဦးထက်မနည်း ‌ေ-သဆုံးခဲ့သည်။ အဆိုပါဖြစ်စဉ်နှင့် ပတ်သက်၍ လုံခြုံရေးဆိုင်ရာစံနှုန်း ချိုးဖောက်မှုဖြစ်နိုင်ခြေအတွက် ရုရှားစုံစမ်းစစ်ဆေးသူများက ရာဇဝတ်မှုနှစ်ခုဖွင့်ကာ စုံစမ်းဖော်ထုတ်မည်ဖြစ်သည်။

နိုင်ငံပိုင်မီဒီယာကတင်ခဲ့သော ဗီဒီယိုဖိုင်တွင် သင်္ဘောကုန်းပတ်ပေါ် လှိုင်းလုံးများရိုက်ခတ်နေသည်ကို တွေ့ရသည်။

ဒုတိယမြောက် ရုရှားအလံတင်သင်္ဘောဖြစ်သည့် အရှည် ၁၃၂ မီတာရှိ Volgoneft ၂၃၉ သည် ပျက်စီးခဲ့ပြီးနောက် မျောပါနေခဲ့သည်ဟု အရေးပေါ်ဖြစ်ရပ်များဆိုင်ရာ ဝန်ကြီးဌာနက ပြောဆိုခဲ့ပြီး သင်္ဘောပေါ်တွင် သင်္ဘောသား ၁၄ ဦး ပါရှိသည်ဟု ဆိုခဲ့သည်။

Kerch ရေလက်ကြားသည် ရုရှား၏ အစေ့အဆန်များ တင်ပို့ရာ အဓိကလမ်းကြောင်းတစ်ခုဖြစ်သကဲ့သို့ ရေနံစိမ်း၊ လောင်စာဆီနှင့် သဘာဝဓါတ်ငွေ့ရည်များ တင်ပို့ရာတွင်လည်း အသုံးပြုနေခဲ့သည်။

Ref: MSN