ယခုသီတင်းပတ်အတွင်း မြန်မာ့အရေး အစည်းအဝေးနှစ်ခုကို လက်ခံကျင်းပသွားမည်ဖြစ်ကြောင်း ထိုင်းနိုင်ငံက တနင်္လာနေ့တွင် ပြောကြားခဲ့ပြီး ယင်းတွင် အနည်းဆုံးအစည်းအဝေးတစ်ခု၌ နစက ကိုယ်စားလှယ်များပါဝင်မည်ဖြစ်သည်ဟု ဆိုခဲ့သည်။ မလေးရှားဝန်ကြီးချုပ်ကလည်း မြန်မာကို အာဆီယံတွင် ပြန်လည်ပါဝင်လာစေရေး ကြိုးပမ်းလျက်ရှိသည်ဟု ပြောဆိုထားသည်။
မြန်မာ့အရေး ဖြေရှင်းနိုင်ရန် အလွတ်သဘောဆွေးနွေးပွဲများ လက်ခံကျင်းပမည်ဟု ထိုင်းနိုင်ငံက အောက်တိုဘာလတွင် ကမ်းလှမ်းခဲ့ပြီးနောက် ထိုင်းနိုင်ငံခြားရေးဝန်ကြီး မာရစ် ဆန်ဂီယမ်ပွန်ဆာက ဒီဇင်ဘာ ၁၉ နှင့် ၂၀ ရက်တို့တွင် သီးခြားစီ ဆွေးနွေးပွဲများကျင်းပသွားမည်ဖြစ်သည်။
ကြာသပတေးနေ့တွင် ပြုလုပ်မည့် ဆွေးနွေးပွဲ၌ မြန်မာကိုယ်စားလှယ်များ ပါဝင်မည်ဖြစ်ပြီး နယ်စပ်လုံခြုံရေးနှင့် နိုင်ငံဖြတ်ကျော် ရာဇဝတ်မှုများဆိုင်ရာ အလွတ်သဘောဆွေးနွေးမှုဖြစ်လိမ့်မည်ဟု ထိုင်းနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Nikomdej Balankura က ပြောဆိုခဲ့သည်။
မြန်မာနှင့် နယ်နိမိတ်ထိစပ်သည့် တရုတ်၊ အိန္ဒိယ၊ ဘင်္ဂလားဒေ့ရှ်၊ လာအိုနှင့် ထိုင်းနိုင်ငံတို့မှ ကိုယ်စားလှယ်များလည်း ယင်းအစည်းအဝေးကို တက်ရောက်ကြမည်ဖြစ်သည်။
သောကြာနေ့တွင် အာဆီယံ၏ မြန်မာ့အရေး ၌ အကျိုးစီးပွားပါဝင်ပတ်သက်သော အဖွဲ့ဝင်နိုင်ငံများပါဝင်သည့် နိုင်ငံခြားရေးဝန်ကြီးအဆင့် ဆွေးနွေးပွဲပြုလုပ်မည်ဖြစ်ပြီး အာဆီယံ၏ မြန်မာ့ငြိမ်းချမ်းရေး သဘောတူညီချက်ငါးရပ်ကို ဆွေးနွေးမှုလည်း ပါဝင်မည်ဖြစ်ကြောင်း Nikomdei က ပြောဆိုသည်။
အဆိုပါ အစည်းအဝေးတွင် မြန်မာကိုယ်စားပြုသူ တက်ရောက်မည်လားဆိုသည်နှင့် မည်သည့်ရာထူးအဆင့် တက်ရောက်မည်ဆိုသည်ကို ရှင်းလင်းစွာ မသိရပေ။
Ref: သည်စထရိတ်တိုင်းမ်စ်