ဆယ်စုနှစ်ကျော် ရပ်တည်ခဲ့သည့် အင်းလေးအမွေအနှစ်ဖောင်ဒေးရှင်း ပိတ်သိမ်းတော့မည်

(၁၅)နှစ်ကြာ ရပ်တည်ခဲ့သည့် အင်းလေးအမွေအနှစ် ဖောင်ဒေးရှင်းကို ဆက်လက်ရပ်တည်ရန် အခက်အခဲများကြောင့် ပိတ်သိမ်းတော့မည် ဖြစ်ကြောင်း သိရသည်။

လက်ရှိနိုင်ငံ၏ အကြပ်အတည်း၊ ကိုဗစ်နောက်ပိုင်းအဆင်မပြေမှုများစွာကြောင့် ယခုနှစ်ကုန်ပါက စတင်ပိတ်သိမ်းတော့မည်ဖြစ်ကြောင်းလည်း အင်းလေးအမွေအနှစ် ဖောင်ဒေးရှင်းက ဆိုသည်။

အင်းလေးအမွေအနှစ် ဖောင်ဒေးရှင်းသည် မြန်မာနိုင်ငံ၌ မတွေ့ရတော့သည့် မြန်မာ့မျိုးရင်း ဗမာကြောင်ကို မြန်မာနိုင်ငံတွင် အများလေ့လာသိရှိစေရန် ရည်ရွယ်ပြီး ပြန်လည်ခေါ်ဆောင်လာခြင်းမှ စတင်ခဲ့ခြင်း ဖြစ်သည်။

ထို့ပြင် အမွေအနှစ် ထိန်းသိမ်းစောင့်ရှောက်ခြင်း လုပ်ငန်းများ၊ အမှတ်တရပစ္စည်း အရောင်းဆိုင်များနှင့် အင်းလေးဒေသလူနေမှုပုံစံများ သိရှိစေရန် ခြေတံရှည်အိမ်များကို တိုးချဲ့ဆောက်လုပ်ခဲ့ကြောင်းလည်း သိရသည်။

ထိုနည်းတူ အင်းလေးအမွေအနှစ် ဖောင်ဒေးရှင်းမှ ဟိုတယ်သက်မွေးမှု သင်တန်းကျောင်း ထပ်မံဖွင့်လှစ်ခဲ့ပြီး ဒေသခံ လူငယ် (၃၆၆)ဦးအထိ သင်ကြားပေးနိုင်ခဲ့သေးသည်။