ရှမ်း/မြောက် လားရှိုးမြို့ ယာဉ်ရပ်နားစခန်းများဖြစ်သည့် နားမခေါ်ယာဉ်ရပ်နားစခန်း၊ မန်ဆူယာဉ်ရပ်နားစခန်း၊ (၄၁) ယာဉ်ရပ်နားစခန်းတို့ရှိ ခရီးသည်တင်ယာဉ်ကားလေးဂိတ်များ ယခုဒီဇင်ဘာလအတွင်း ပြန်လည်ဖွင့်လှစ်လာပြီဖြစ်ကြောင်း လားရှိုးမြို့ ဒေသခံသတင်းရင်းမြစ်များထံက သိရသည်။
အဆိုပါ ယာဉ်ငယ်များအနေဖြင့် လားရှိုး – တောင်ကြီး – မန္တလေးသို့ ပြေးဆွဲရာတွင် ပင်လုံ – လဲချား – ကြေးသီး – ဟိုယ လမ်းပိုင်းမှသာ အဓိကထား ပြေးဆွဲနေကြရကြောင်း သိရသည်။
ထိုသို့ ကားလေးဂိတ်များ ဖွင့်လှစ်လာသော်လည်း လားရှိုး – မန္တလေးလမ်းပိုင်းနှင့် မူဆယ် – လားရှိုးလမ်းပိုင်းတို့တွင် အစစ်အဆေးများ တင်းကြပ်သဖြင့် ဒေသတွင်း ခရီးသွားလာမှု အခက်အခဲများစွာကြုံတွေ့နေရဆဲဖြစ်ကြောင်း ယာဉ်မောင်းများထံမှသိရှိရသည်။
“အခုတလောက ခရီးသည်ရော ကုန်ရော ပါးနေသေးတယ်ဗျ။ ခရီးသည်ဆိုလည်း အခုရက်ပိုင်း အသွားအလာပိုကြပ်ထားတယ်။ လမ်းကြောင်းမကောင်းတော့ နှစ်ရက်တစ်ခါ၊သုံးရက်တစ်ခါလောက်ပဲ ကားထွက်ရတယ်ဗျ”ဟု လားရှိုး – တောင်ကြီး – မန္တလေး ယာဉ်မောင်းသူတစ်ဦးက ပြောသည်။
လက်ရှိ ယာဉ်စီးခများမှာ လားရှိုး- မန္တလေးခရီးစဉ်အတွက် လူတစ်ဦးလျှင် ရှေ့ခန်း ကျပ်(၁၅၀,၀၀၀)-မှ ကျပ် (၂၀၀,၀၀ဝ)အထိ ၊ နောက်ခန်းတစ်ဦးလျှင် ကျပ်(၁၂၀,၀၀၀)မှ ကျပ် (၁၅၀,၀၀၀)အထိ ယာဉ်အမျိုးအစားအပေါ်မူတည်၍ ပေါက်ဈေးရှိနေကာ၊ ယာဉ်စင်းလုံးငှားရမ်းပါက ကျပ် (၅၀၀,၀၀၀) မှ (၇၀၀,၀၀၀)အထိရှိကြောင်းသိရှိရသည်။
ရှမ်း/မြောက် ဒေသတွင်း နှစ်ဖက်လက်နက်ကိုင်တပ်များ၏ စစ်ဆေးမှု တင်းကြပ်မှုများကြောင့် ခရီးသွားရာသီရောက်ပြီဖြစ်သော်လည်း အသွားအလာ နည်းပါးနေသဖြင့် ဖြေလျော့သင့်သည်များဖြေလျော့ပေးရန် ဒေသခံပြည်သူများကမျော်လင့်နေကြကြောင်း သိရသည်။
လက်ရှိတွင် လားရှိုးမြို့၌ တိုက်ပွဲများရပ်တန့်နေသည်မှာ (၂)လကျော်ကြာမြင့်နေပြီဖြစ်ကြောင်း ဒေသခံများထံမှ စုံစမ်းသိရသည်။