ယီမင်နိုင်ငံ Ansar Allah လှုပ်ရှားမှုမှ ဟူသီများသည် ပင်လယ်နီတွင် USS Harry S. Truman လေယာဉ်တင်သင်္ဘောကို တိုက်ခိုက်ခဲ့ပြီး F/A-18 တိုက်လေယာဉ်တစ်စင်းကိုလည်း ပစ်ချခဲ့ကြောင်း ယင်းလှုပ်ရှားမှု၏ စစ်ဘက်ပြောရေးဆိုခွင့်ရှိသူ Yahya Sarea က ပြောကြားခဲ့သည်။
“ကျွန်ုပ်တို့၏ လက်နက်ကိုင်တပ်ဖွဲ့များသည် မနေ့ညနေပိုင်းတွင် USS Harry S. Truman လေယာဉ်တင်သင်္ဘော နှင့် အခြားသော ဖျက်သင်္ဘောများကို တိုက်ခိုက်ခြင်းဖြင့် ကျွန်ုပ်တို့နိုင်ငံကို အမေရိကန်နှင့် ဗြိတိန်တို့၏ တိုက်ခိုက်မှုမှ တားဆီးနိုင်ခဲ့သည်” Yahya Sarea က ဟူသီထိန်းချုပ်ထားသော Al Masirah ရုပ်မြင်သံကြားလိုင်းသို့ ပြောကြားခဲ့သည်။
သူ၏ ပြောကြားချက်အရ အမေရိကန်စစ်သင်္ဘောများကို တိုက်ခိုက်ရာတွင် ခရုဇ်ဒုံးကျည် ၈ စင်းနှင့် ဒရုန်း ၁၇ စင်းတို့ကို အသုံးပြုခဲ့ခြင်းဖြစ်သည်ဟု ဆိုသည်။
ဟူသီတိုက်ခိုက်မှုအတွင်း အနောက်နိုင်ငံများမှ စစ်လေယာဉ်အများစုသည် ပင်လယ်နီ၏ နိုင်ငံတကာရေပိုင်နက်တွင်ရောက်ရှိနေသည့် လေယာဉ်တင်သင်္ဘောကို ခုခံကာကွယ်ရန် ယီမင်လေပိုင်နက်မှ ထွက်ခွာသွားခဲ့ကြောင်း သိရသည်။
စနေနေ့ညနေပိုင်းတွင် ဟူသီများထိန်းချုပ်ထားသော ယီမင်နိုင်ငံမြို့တော် Sana တွင် ကြီးမားသော လေကြောင်းတိုက်ခိုက်မှုတစ်ခု ဖြစ်ပွားခဲ့ကြောင်း Al Masirah နှင့် Saba သတင်းဌာနတို့ထံမှ သိရသည်။ အမေရိကန် ဗဟိုကွပ်ကဲရေးဌာနချုပ်(CENTCOM) ၏ အဆိုအရ အမေရိကန် စစ်တပ်သည် ဟူသီ ကွပ်ကဲမှု စခန်းများနှင့် မြို့တွင်းရှိ ဒုံးကျည် စခန်းများကို ပစ်မှတ်ထား တိုက်ခိုက်ခဲ့ကြောင်း သိရသည်။ ဟူသီဒရုန်းအများအပြားနှင့် သင်္ဘောဖျက် ခရုဇ်ဒုံးကျည်များကိုလည်း ပစ်ချခဲ့သည်။
USS Harry S. Truman လေယာဉ်တင်သင်္ဘော ပါဝင်သည့် ရေယာဉ်အုပ်စုမှ ပဲ့ထိန်းဒုံးကျည်တပ် ခရူဇာစစ်သင်္ဘော USS Gettysburg သည် မှားယွင်းပစ်ခတ်မှုတစ်ခုပြုလုပ်ခဲ့ပြီး USS Harry S. Truman လေယာဉ်တင်သင်္ဘောပေါ်မှ ပျံသန်းလာသော F/A-18 တိုက်လေယာဉ်ကို ထိမှန်ခဲ့ကြောင်း အမေရိကန် ဗဟိုကွပ်ကဲရေးဌာနချုပ်(CENCOM)မှ ပြောကြားခဲ့သည်။လေယာဉ်ပျက်ကျခဲ့သော်လည်း လေယာဉ်မှူးနှစ်ဦးစလုံးကို ကယ်ဆယ်နိုင်ခဲ့ပြီး ၎င်းတို့ထဲမှ တစ်ဦးမှာ ဒဏ်ရာအနည်းငယ်ရရှိခဲ့ကြောင်းသိရသည်။
