အမေရိက၏ F/A-18 တိုက်လေယာဉ်တစ်စင်းသည် ဒီဇင်ဘာ ၂၂ ရက်အစောပိုင်းက ပင်လယ်နီဝေဟင်တွင် မှားယွင်း၍ ပစ်ချခံခဲ့ရပြီး လေယာဉ်မှူးနှစ်ဦးမှာ ခုန်ထွက်လွတ်မြောက်ခဲ့ကြောင်းသိရသည်။ ဖြစ်စဉ်သည် အချင်းချင်းမှားယွင်းပစ်ခတ်မှုဟု ယူဆရကြောင်း စစ်ဘက်တာဝန်ရှိသူများက ပြောကြားသည်။
အမေရိကန်ဗဟိုစစ်ဌာနချပ်၏ သတင်းထုတ်ပြန်ချက်အရ လေယာဉ်မှူးတစ်ဦးသည် ဒဏ်ရာ အသေးအဖွဲများရရှိခဲ့သည်ဟု ဆိုသည်။
အမေရိကန်တိုက်ခိုက်ရေးလေယာဉ်တင်သင်္ဘောအုပ်စု ယူအက်စ်အက်စ် ဟယ်ရီ အက်စ် ထရူးမင်းမှ ပဲ့ထိန်းဒုံးတပ် ခရုဇာစစ်သင်္ဘော USS Gettysburg သည် လေယာဉ်တင်သင်္ဘောပေါ် ပျံသန်းနေသည့် လေယာဉ်ကို မှားယွင်းပစ်မိခဲ့ခြင်းဖြစ်သည်ဟု ထုတ်ပြန်ချက်တွင် ပြောဆိုခဲ့သည်။
ဖြစ်စဉ်ကို စေ့စေ့စပ်စပ် စုံစမ်းစစ်ဆေးမှုလုပ်နေသည်ဟု စစ်တပ်က ပြောဆိုခဲ့သည်။
အစ္စရေး-ဟားမတ်စ်စစ်ပွဲပေါ်ပေါက်ခဲ့ပြီးနောက်ပိုင်း ယီမင်နိုင်ငံရှိ အီရန်ကျောထောက်နောက်ခံပြု ဟူသီသူပုန်အဖွဲ့က ကူးသန်းရောင်းဝယ်ရေးသင်္ဘောများကို ဆက်လက်တိုက်ခိုက် နေခြင်းကြောင့် အမေရိကန်ရေတပ်သည် အဆိုပါရေပြင်တွင် ကင်းလှည့်စောင့်ကြပ်နေသည်မှာ တစ်နှစ်ကျော်ကြာပြီဖြစ်သည်။
အမေရိကန်တပ်ဖွဲ့သည် ဟူသီသူပုန်များအသုံးပြုသည့် ဒုံးကျည်သိုလှောင်ရုံတစ်ခု၊ ကွပ်ကဲထိန်းချုပ်ရေးအဆောက်အအုံတစ်ခုတို့ကို တိကျသော လေကြောင်းတိုက်ခိုက်မှု ပြုလုပ်ခဲ့သကဲ့သို့ လူမဲ့ဒရုန်းများနှင့် သင်္ဘောဖျက်ဒုံးကျည်တစ်စင်းတို့ကို ပစ်ချခဲ့သည်ဟု အမေရိကန်စစ်တပ်က အခင်းမဖြစ်မီ နာရီများစွာအကြာက ပြောကြားထားခဲ့သည်။
အဆိုပါစစ်ဆင်ရေးတွင် အမေရိကန်လေတပ်၊ ရေတပ်နှင့် F/A-18 တိုက်လေယာဉ်များ ပါဝင်ခဲ့သည်။
Ref: အေဘီစီနူးစ်
