နယ်စပ်တွင် ကာလဝမ်းရောဂါဖြစ်ပွားနေ၍ ထိုင်းက သတိပေးချက်ထုတ်

မြန်မာနိုင်ငံဘက်ခြမ်းရှိ ရွှေကုက္ကိုလ်မြို့တွင် ကာလဝမ်းရောဂါပျံ့နှံ့ဖြစ်ပွားနေသဖြင့် ရောဂါတားဆီးထိန်းချုပ်ရေးအတွက် ထိုင်းနိုင်ငံ တာ့ခ်ပြည်နယ်တွင် ကျန်းမာရေးဝန်ကြီးဌာနက အရေးပေါ်ကုသရေးစင်တာတစ်ခု(EOC) ဖွင့်လှစ်လိုက်သည်။ လက်ရှိတွင် တာ့ခ်ပြည်နယ်၌ အဆိုပါရောဂါဖြစ်ပွားသူ နှစ်ဦး တွေ့ထားသည်ဟု ဆိုသည်။

EOC သည် နယ်စပ် ရပ်ကွက်ကျေးရွာများ၊ စက်ရုံများနှင့် ဒုက္ခသည်စခန်းများတွင် ကာလဝမ်းရောဂါဖြစ်နိုင်ခြေကို စောင့်ကြည့်နေသည်ဟု ကျန်းမာရေးဝန်ကြီးဌာန အမြဲတမ်းအတွင်းဝန် ဒေါက်တာ Opas Karnkawwinpong က ပြောဆိုသည်။

ထို့အပြင် အဆိုပါစင်တာအနေဖြင့် သောက်သုံးရေအရည်အသွေးကို စောင့်ကြည့်စစ်ဆေးခြင်း၊ အများပြည်သူများ၊ ရွှေ့ပြောင်းဝင်ရောက်သူများကို တစ်ကိုယ်ရေသန့်ရှင်းမှုနှင့်ပတ်သက်၍ အကြံပေးခြင်း၊ အစားအသောက်ရောင်းချသူများ၊ လမ်းဘေးဈေးသည်များကို ကြီးကြပ်ကွပ်ကဲခြင်းနှင့် ရောဂါထိန်းချုပ်နိုင်ရေးအတွက် စမ်းသပ်ကိရိယာများအပါအဝင် ဆေးပစ္စည်းများထောက်ပံ့ရေး ပြင်ဆင်ခြင်းများကိုလည်း လုပ်ဆောင်မည်ဖြစ်သည်ဟု သူက ဆက်လက် ပြောဆိုခဲ့သည်။

တာ့ခ်ပြည်နယ်၏ မဲရာမတ်နှင့် မဲဆောက်ခရိုင်များသည် ရွှေကုက္ကိုလ်နှင့် မျက်နှာချင်းဆိုင်ဒေသများဖြစ်နေခြင်းနှင့် ရွှေ့ပြောင်းနေထိုင်သူများ၊၊ စက်ရုံအလုပ်ရုံများရှိနေခြင်းကြောင့် အန္တရာယ်မြင့်မားသည့် အခြေအနေတွင်ရှိကြောင်းနှင့် နှစ်သစ်ကူးအားလပ်ရက်များတွင် လူများစွာသည် ပျော်ပွဲရွှင်ပွဲများကျင်းပကာ အစားအသောက်များကို အတူစားသောက်ကြလိမ့်မည်ဟု ဒေါက်တာ Opas က ပြောဆိုသည်။

ကျန်းမာရေး အမြဲတမ်းအတွင်းဝန်၏ အဆိုအရ ရွှေကုက္ကိုလ်တွင် ကာလဝမ်းရောဂါလူနာ ၂၀၀ ခန့် တွေ့ရှိထားကာ နှစ်ဦး‌ေ-သဆုံးထားကြောင်းနှင့် မဲဆောက်ခရိုင်တွင် ရောဂါလူနာ နှစ်ဦးတွေ့ရှိထားကြောင်း သိရသည်။

အဆိုပါ လူနာနှစ်ဦးသည် မဲဆောက်ဆေးရုံတွင် တက်ရောက်ကုသမှုခံယူနေသည်ဟု သတင်းထုတ်ပြန်ထားသည်။ မြန်မာနိုင်ငံသား ကိုယ်ဝန်ဆောင်အမျိုးသမီးတစ်ဦးသည် ထိုင်းဘက်ခြမ်းတွင် ဝမ်းရောဂါစတင်ဖြစ်ပွားစေခဲ့သည်ဟု တာဝန်ရှိသူများက ယူဆထားပြီး သူ့ထံအလည်သွားခဲ့သော တာ့ခ်ပြည်နယ်မှ မြန်မာဆွေမျိုးသားချင်းတစ်ဦးသည်လည်း ရောဂါကူးစက်ခံခဲ့ရသည်ဟု ဆိုသည်။

လက်ရှိအချိန်တွင် ထိုင်းစစ်သားများသည် မဲရမတ်နှင့် မဲဆောက်ခရိုင်နယ်စပ်တွင် တရားမဝင် နယ်စပ်ဖြတ်ကျော်ဝင်ရောက်မှုများကို တားဆီးရန်အတွက် အထူးကြပ်မတ်ကင်းလှည့်ဆောင်ရွက်မှုလုပ်နေသည်။ ရောဂါထိန်းချုပ်ရေးနိုင်ရေးဆိုင်ရာ တောင်းဆိုချက်အရ တာ့ခ်ပြည်နယ်အာဏာပိုင်များက ရွှေကုက္ကိုလ်ရှိ တာဝန်ရှိသူများထံ ဆေးဝါးထောက်ပံ့မှုများ ပေးအပ်ခဲ့သည်ဟု သိရသည်။

Ref: ဘန်ကောက်ပို့စ်