အိန္ဒိယနိုင်ငံတွင် ၂၀၀၄ ခုနှစ်မှ ၂၀၁၄ ခုနှစ်အထိ ဝန်ကြီးချုပ်အဖြစ် တာဝန်ထမ်းဆောင်ခဲ့သော အိန္ဒိယဝန်ကြီးချုပ်ဟောင်း မန်မိုဟန်ဆင်းသည် ကြာသပတေးနေ့က နယူးဒေလီမြို့တွင် ကွယ်လွန်ခဲ့သည်။ ကွယ်လွန်ချိန်တွင် အသက် ၉၂ နှစ်အရွယ်ရှိပြီဖြစ်သည်။ သူသည် ကျော်ကြားသော စီးပွားရေးပညာရှင်တစ်ဦးဖြစ်ပြီး အိန္ဒိယနိုင်ငံ စီးပွားရေးပြုပြင်ပြောင်းလဲမှု၏ ဖခင်အဖြစ် လူသိများသည့် ထင်ရှားကျော်ကြားသူတစ်ဦးလည်းဖြစ်သည်။
“အိန္ဒိယနိုင်ငံ၏ အထင်ရှားဆုံးသော ခေါင်းဆောင်များထဲမှ တစ်ယောက်ဖြစ်သည့် ဒေါက်တာ မန်မိုဟန်ဆင်းကို ဆုံးရှုံးလိုက်ရသည့်အတွက် အထူးပင် ဝမ်းနည်းကြေကွဲမိပါသည်” ဟု လက်ရှိဝန်ကြီးချုပ် နာရန်ဒရာ မိုဒီက X လူမှုကွန်ရက်တွင် ရေးသားခဲ့သည်။ “မိမိကိုယ်မိမိ နှိမ့်ချနေထိုင်သည့်မျိုးရိုးမှ ကြီးပြင်းလာသော လေးစားဖွယ် စီးပွားရေးပညာရှင်တစ်ဦး ဖြစ်ကာ … ကျွန်ုပ်တို့၏ ဝန်ကြီးချုပ်အဖြစ်၊ လူထုဘဝတိုးတက်စေရေးကို ကျယ်ကျယ်ပြန့်ပြန့် ကြိုးပမ်းခဲ့သူလည်းဖြစ်သည်”ဟု မိုဒီက ရေးသားထားသည်။
မန်မိုဟန်ဆင်းသည် ၂၀၀၄ ခုနှစ်မှ ၂၀၁၄ ခုနှစ်အတွင်း အိန္ဒိယနိုင်ငံ၏ ဝန်ကြီးချုပ်အဖြစ် တာဝန်ထမ်းဆောင်ခဲ့သော်လည်း ၁၉၉၀ ခုနှစ်များအစောပိုင်းက ဘဏ္ဍာရေးဝန်ကြီးအဖြစ် သူတာဝန်ထမ်းဆောင်ခဲ့ချိန်များသည် အထူးခြားဆုံးဖြစ်သည်ဟု နိုင်ငံရေးဝေဖန်သုံးသပ်သူများက ပြောဆိုကြသည်။ ထိုကာလအတွင်း သူ၏မူဝါဒများသည် အိန္ဒိယနိုင်ငံအား စီးပွားရေးလွတ်လပ်ခွင့်နှင့် ဂလိုဘယ်လိုက်ဇေးရှင်း၏လမ်းကြောင်းပေါ်သို့ တင်ပေးခဲ့သည်။
မစ္စတာမန်မိုဟန်ဆင်းသည် “ပညာရှိ၊ တွေးခေါ်တတ်သူ၊ ရိုးသားသူ” ဟူ၍လည်း အမေရိကန်သမ္မတဟောင်း ဘားရက်အိုဘားမား က သူရေးသားသော A Promised Land မှတ်တမ်းတွင် ရေးသားဖော်ပြခဲ့သည်။
မစ္စတာမန်မိုဟန်ဆင်းကို ၁၉၃၂ ခုနှစ် စက်တင်ဘာလ ၂၆ ရက် နေ့က ယခု ပါကစ္စတန်နိုင်ငံနယ်နိမိတ်အတွင်းရှိ ဂါးဟုခေါ်သော ရွာကလေးတွင် မွေးဖွားခဲ့ခြင်းဖြစ်သည်သည်။