ဗန်းမော်မြို့ စစ်ရှောင်များအတွက် ရွှေကူမြို့တွင် ယာယီခိုလှုံမည့် နေရာ (၄)နေရာကို ရွှေကူမြို့နယ်လုံးဆိုင်ရာ နာရေးကူညီမှုအသင်းက စီစဉ်ပေးထားထားကြောင်း ဒေသခံသတင်းရင်းမြစ်တစ်ဦးထံက သိရသည်။
ထို့ပြင် ယာယီခိုလှုံနေထိုင်သူများအတွက် တစ်ရက်လျှင် နံနက်၊ နေ့လယ်၊ ည (၃)နပ် ကျွေးမွေးလျက်ရှိကြောင်းသိရသည်။
“စစ်ဘေးရှောင်တွေကို နေစရာနေရာ ထိုင်ခင်းများအသင့်စီစဉ်ကူညီပေးနေပါတယ်။ ရွှေကူမှာနေထိုင်တည်းခိုလိုသူတွေအတွက်လည်း နေရာလေးနေရာခွဲပြီးနေရာချထားပေးပါတယ်။ စားစရာအတွက်လဲ အလှူငွေလက်ကျန်ရှိတဲ့ အချိန်ထိကျွေးမွေးသွားမှာပါ”ဟု ဆိုသည်။
တိုက်ပွဲများဖြစ်ပွားနေသည့် ဗန်းမော်မြို့မှ စစ်ရှောင်လိုသူများအနေဖြင့် ရွှေကူမြို့အထိ မိမိအစီအစဉ်ဖြင့်လာရောက်ရမည်ဖြစ်ကာ ရွှေကူမြို့တွင် အသင့်နေထိုင် စားသောက်နိုင်ရန်စီစဉ်ပေးထားခြင်းဖြစ်သည်ဟု သိရသည်။
ယင်းအပြင် ရွှေကူမြို့မှ မန္တလေးမြို့သို့ ထပ်မံတိမ်းရှောင်လိုသူများကိုလည်း ဒေသခံပရဟိတ ယာဉ်များဖြင့် အသုတ်လိုက် ပို့ဆောင်ပေးနေပြီး ပရဟိယာဉ်မစီးလိုသူများအတွက်လည်း မိမိတို့ကြိုက်နှစ်သက်ရာယာဉ်လိုင်းများ၌ ကားလက်မှတ်ဖြတ်၍ ရွှေကူ-မန္တလေး တစ်ညအိပ်နှစ်ရက်ခရီးစဉ်ကိုလည်း စီးနှင်းနိုင်ကြောင်း သိရသည်။
လက်ရှိတွင် ရွှေကူမြို့သို့ရောက်ရှိနေသော ဗန်းမော်စစ်ရှောင်ပြည်များအနက် မြိုင်သာယာ (၂၅၀၀)ကျောင်းတွင်ရောက်ရှိနေသူ (၁၀၅)ဦး၊ မင်္ဂလာပရိယတ္တိစာသင်တိုက်တွင်(၁၆)ဦး၊ မင်္ဂလာကျောင်းတိုက်တွင် (၇၈)ဦး စုစုပေါင်း (၁၉၉)ဦး ခိုလှုံနေထိုင်လျက်ရှိကြောင်း သိရသည်။