၂၀၂၅ ခုနှစ်အတွင်း မြန်မာနိုင်ငံ၌သစ်တောဖုံးလွှမ်းမှုသည် နိုင်ငံဧရိယာ၏ ၄၂ ရာခိုင်နှုန်းကျော်ရှိမည်ဟုခန့်မှန်းထားကြောင်း သယံဇာတနှင့် သဘာဝပတ်ဝန်ကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီးဦးခင်မောင်ရီက ပြောသည်။
၎င်းမှ ဒီဇင်ဘာ ၈ ရက်နံနက်ပိုင်းက နေပြည်တော်၊ ဥတ္တရသီရိမြို့နယ်ရှိ သစ်တောသုတေသနစခန်းအမှတ် ၅ (မိုးစွေ)၌တက်ရောက်နေသည့် မြန်မာနိုင်ငံသစ်တောကျောင်း အမှတ်စဉ်(၁၁၈)မှ သင်တန်းသားများအားတွေ့ဆုံစဉ် ပြောကြားခဲ့ခြင်းဖြစ်သည်။
သစ်တောသယံဇာတ ဆန်းစစ်လေ့လာခြင်း အချက်အလက်များအရ ၂၀၂၅ ခုနှစ်အတွင်း မြန်မာနိုင်ငံ၌သစ်တောဖုံးလွှမ်းမှုသည် နိုင်ငံဧရိယာ ၏ ၄၂ ဒသမ ၁၅ ရာခိုင်နှုန်းရှိမည်ဟုခန့်မှန်းထားကာ ၂၀၂၀ ပြည့်နှစ်မှ ၂၀၂၅ ခုနှစ်အတွင်း သစ်တောပြုန်းတီးမှုမှာ နိုင်ငံဧရိယာ၏ ၀ ဒသမ ၀၄ ရာခိုင်နှုန်းရှိသည်ဟု ပြောသည်။
ထို့ကြောင့် သစ်တောဖုံးလွှမ်းမှုပြန်လည်ကောင်းမွန်လာစေရန် သဘာဝတောများကာကွယ်ခြင်း၊ သစ်တောစိုက်ခင်းများတည်ထောင်ခြင်းနှင့် ကြိုးဝိုင်း/ကြိုးပြင်ကာကွယ်တောများအား တိုးချဲ့ဖွဲ့စည်းလျက်ရှိသည်ဟု ပြောသည်။
” ဒီနေ့အချိန်အထိ ကြိုးဝိုင်း/ကြိုးပြင် ကာကွယ်တော ၄၉၀ ခု၊ နိုင်ငံဧရိယာရဲ့ ၂၅ ဒသမ ၉၀ ရာခိုင်နှုန်းနဲ့ သဘာဝထိန်းသိမ်းရေးနယ်မြေ ၆၁ ခု၊ နိုင်ငံဧရိယာရဲ့ ၆ ဒသမ ၄၃ ရာခိုင်နှုန်းကို ဖွဲ့စည်းဆောင်ရွက်ခဲ့ပြီးဖြစ်ပါတယ်။ အပူပိုင်းဒေသ ၁၃ ခရိုင် စိမ်းလန်းစိုပြည်ရေးနဲ့ လမ်းဘေးဝဲယာစိမ်းလန်းစိုပြည်ရေးအတွက် ၂၀၂၄ ခုနှစ် မိုးရာသီမှာ အပင်ပေါင်း ၂ သန်းကျော်စိုက်ပျိုးခဲ့ပြီးဖြစ်ပါတယ်”ဟု ပြည်ထောင်စုဝန်ကြီးက ပြော သည်။
ထို့ပြင် ရေကြီးရေလျှံမှု၊ မြေပြိုတိုက်စားမှုထိန်းချုပ်ရေးနှင့် ရေသယံဇာတအရင်းအမြစ်များ ပံ့ပိုးပေးနိုင်ရန် ရေဝေရေလဲထိန်းသိမ်းရေးလုပ်ငန်းများ၊ ကမ်းရိုးတန်းသယံဇာတထိန်းသိမ်းရေးလုပ်ငန်းများနှင့် တရားမဝင်သစ်တားဆီးရေးလုပ်ငန်းများကို အရှိန်အဟုန်ဖြင့်ဆောင်ရွက်လျက်ရှိသည်ဟု ပြည်ထောင်စုဝန်ကြီးက ပြောကြားခဲ့သည်။