ရန်ကုန်တိုင်း၊ စမ်းချောင်းမြို့နယ်၊ ဖျာပုံလမ်းနှင့် ရပ်ကျေးရုံးအနီးတို့၌ ယနေ့ ဒီဇင်ဘာ ၃၀ ရက်နံနက်ပိုင်းက ပေါက်ကွဲမှုများဖြစ်ပွားခဲ့ကြောင်း အခင်းဖြစ်မြို့နယ်နေသူများထံမှ သိရသည်။
နံနက် ၉ နာရီကျော်ခန့်က စမ်းချောင်းမြို့နယ်၊ ကျွန်းတော(အလယ်)ရပ်ကွက်၊ ဖျာပုံလမ်းရှိ ဆေးခန်းတစ်ခုရှေ့ မီးစက်များထားသည့်နေရာနားမှ ပေါက်ကွဲမှုဖြစ်ပွားခဲ့သဖြင့် လုံခြုံရေးအဖွဲ့ဝင်များနှင့် သက်ဆိုင်ရာတာဝန်ရှိသူများက စစ်ဆေးမှုများပြုလုပ်ခဲ့ကြကြောင်း သိရသည်။
” ပေါက်ကွဲမှုဖြစ်တယ်ဆိုတာ ဟုတ်ပါတယ်။ ကျွန်တော်သိရသလောက်ကတော့ ပေါက်ကွဲမှုတစ်ကြိမ်ဖြစ်တယ်။ တစ်ချို့ကပြောကြတာတော့ နှစ်ကြိမ်ပေါက်ကွဲတယ်လို့ပြောကြတယ်။ ဆေးခန်းတစ်ခု မီးစက်ထားတဲ့နေရာနားကနေပေါက်ကွဲတာပါ။ စစ်သားတွေ ရဲတွေကတော့ စစ်ဆေးတာတွေဆက်တိုက်လုပ်နေတယ်။ ပျက်စီးမှုတွေရှိတယ်” ဟု မြို့နယ်နေသူတစ်ဦးက အတည်ပြုပြောကြားခဲ့သည်။
ပေါက်ကွဲမှုကြောင့် ဖြစ်စဉ်နေရာအနီးရပ်ထားသော ကား(၂)စီးအပါအဝင် ပျက်စီးမှုအချို့ဖြစ်ပေါ်ခဲ့သော်လည်း ေ-သဆုံးမှုနှင့်ထိခိုက်ဒဏ်ရာရရှိသူမရှိခဲ့ဘဲ လုံခြုံရေးအဖွဲ့ဝင်များက အခင်းဖြစ်လမ်းအားယာယီပိတ်၍ စစ်ဆေးမှုများပြုလုပ်ခဲ့ကြကြောင်း သိရသည်။
ထို့ပြင် နံနက် ၁၁ နာရီခွဲခန့်ကလည်း ကျွန်းတော(အလယ်)ရပ်ကွက်၊ ဖျာပုံလမ်းရှိ ရပ်ကျေးရုံးအနီး၌ ဒုတိယအကြိမ်ပေါက်ကွဲမှုထပ်မံဖြစ်ပွားခဲ့သဖြင့် (မစိုးရိမ်ရ)ထိခိုက်ဒဏ်ရာရသူ(၃)ဦးရှိခဲ့ပြီး ကားတစ်စီးတွင်လည်း ပျက်စီးမှုအချို့ရှိခဲ့ကြောင်း သိရသည်။
” ကျွန်တော် နောက်ထပ်ပေါက်ကွဲမှုတစ်ခုဖြစ်တာထပ်သိခဲ့ရတယ်။ ဒဏ်ရာရတဲ့လူ(၃)ယောက်ကို စစ်သားတွေက ဆေးရုံပို့ပေးတာတွေ့တယ်။ လမ်းကိုပိတ်ထားပြီး စစ်ဆေးတာတွေလုပ်နေကြတယ်”ဟု မြို့နယ်နေသူတစ်ဦးကပြောသည်။
ပေါက်ကွဲမှုဖြစ်စဉ်များမှ ပြစ်မှုကျူးလွန်သူများအား ဖမ်းဆီးရမိရေးအတွက် လုံခြုံရေးအဖွဲ့ဝင်များက ပိတ်ဆို့စစ်ဆေးမှုများပြုလုပ်လျက်ရှိကြောင်း သိရသည်။
Photo credit