တရုတ်နိုင်ငံဆိုင်ရာ မြန်မာသံအမတ်ကြီးဦးတင်မောင်ဆွေသည် Home and Abroad News Press မှချီးမြှင့်သည့် The News Person of the Year (2024)ဆုရရှိခဲ့ကြောင်း သိရသည်။
အဆိုပါ ဆုပေးပွဲအား ၂၀၂၄ ခုနှစ်၊ ဒီဇင်ဘာ ၃၀ ရက်က တရုတ်နိုင်ငံ၊ ပေကျင်းမြို့ရှိ China National Convention Center ၌ကျင်းပခဲ့ရာ ဆုရရှိခဲ့သည့် မြန်မာသံအမတ်ကြီးမှ နိုင်ငံတစ်နိုင်ငံ၏ အုပ်ချုပ်ရေးစနစ်တွင် မီဒီယာမဏ္ဍိုင်သည် အရေးပါသောအခန်းကဏ္ဍကပါဝင်ကာ ယခုခေတ်တွင် ဆိုရှယ်မီဒီယာများ၌ သတင်းအမှားများ၊ ကောလာဟလများ လျင်မြန်စွာထွက်ပေါ်လျက်ရှိသည်ဟု မိန့်ခွန်းပြောကြားရာ၌ ထည့်သွင်းပြောကြားခဲ့သည်။
ထိုသို့ ထွက်ပေါ်နေခြင်းမှာ နိုင်ငံ၏လုံခြုံရေးနှင့် တည်ငြိမ်အေးချမ်းရေးကိုထိခိုက်စေ၍ ထိရောက်စွာတားဆီးရန်လိုအပ်ပြီး သတင်းများကို မှန်မှန်ကန်ကန်ဖော်ပြပေးနေသည့် မီဒီယာများကိုလည်းလိုအပ်ကာ မြန်မာ-တရုတ်နှစ်နိုင်ငံဆက်ဆံရေးနှင့် နှစ်နိုင်ငံပြည်သူများကြား နားလည် မှုခိုင်မာပြီး ချစ်ကြည်ရင်းနှီးမှုများတိုးပွားရန် မီဒီယာသည် ပိုမိုအရေးပါသောအခန်းကဏ္ဍတွင်ရှိနေသည်ဟုလည်း ပြောကြားခဲ့သည်။
မြန်မာသံအမတ်ကြီးသည် တရုတ်နိုင်ငံသို့ရောက်ရှိတာဝန်ထမ်းဆောင်စဉ်မှစ၍ နှစ်နိုင်ငံဆက်ဆံရေးဖွံ့ဖြိုးတိုးတက်အောင် စဉ်ဆက်မပြတ်ကြိုး ပမ်းဆောင်ရွက်မှုများ၊ ဟဲနန်၊ ဟဲဘေ၊ ယူနန်၊ ကျန်းရှီး၊ ကွမ်ရှီး၊ ရှန်းတုံး၊ ကျီလင်းနှင့် အခြားပြည် နယ်များသို့သွားရောက်၍ စီးပွားရေးဆက်ဆံရေးများကိုထူထောင်ခဲ့ကာ သိသာထင်ရှားသော ပူးပေါင်းဆောင်ရွက်မှုများ၊ သံအမတ်ကြီး၏ ဆောင်ရွက်ပေးမှုကြောင့် တရုတ်-မြန်မာစီးပွား ရေးစင်္ကြံတည်ဆောက်မှုအတွက် ယူနန်-မြန်မာ စီ မံကိန်းများကို ပိုမိုနက်ရှိုင်းအောင်ဆောင်ရွက်နိုင်ခဲ့ခြင်းတို့ကြောင့် ဆုချီးမြှင့်ခံရခြင်းဖြစ်သည်။
အဆိုပါ The News Person of the Year (2024) ဆုသည် ကမ္ဘာ့ငြိမ်းချမ်းရေးနှင့် ဖွံ့ဖြိုးတိုးတက်ရေး၊ တရုတ်နိုင်ငံနှင့် သက်ဆိုင်ရာနိုင်ငံများကြား ချစ်ကြည်ရင်းနှီးသောဆက်ဆံရေးများကို တည်ဆောက်ပေးနိုင်ခဲ့သည့် တရုတ်နိုင်ငံဆိုင်ရာ နိုင်ငံခြားသံအမတ်ကြီးများအားချီးမြှင့်ပေးအပ်ခြင်းဖြစ်သည်။
ယင်း ဆုအား မြန်မာသံအအမတ်ကြီးနှင့်အတူ တရုတ်နိုင်ငံဆိုင်ရာ ပီရူး၊ ကာဇက်စတန်၊ ဘယ်လာရုစ်၊ သီရိလင်္ကာနှင့် နိုက်ဂျီးရီးယားနိုင်ငံတို့မှ သံအမတ်ကြီးများလည်းရရှိခဲ့သည်။