နိုင်ငံတော်က အပ်နှင်းဆက်ကပ်သည့် သာသနာတော်ဆိုင်ရာ အဘိဓဇမဟာရဋ္ဌဂုရု ဘွဲ့တံဆိပ်တော်ကို မော်လမြိုင်မြို့ ပရိယတ္တိစာသင်တိုက်ကြီး၏ ဦးစီးပဓာန နာယက မြစေတီဝံသာဓိပတိအဂ္ဂ မဟာပဏ္ဍိတ ဝိနယပါဠိပါရဂူ မြစေတီဆရာတော်ဘုရားကြီး ဆက်ကပ်ခံခဲ့ရကြောင်း သိရသည်။
အဆိုပါ အဘိဓဇမဟာရဋ္ဌဂုရု ဘွဲ့တံဆိပ်တော်ဆက်ကပ်ခံရသည့် ဆရာတော် (၉)ပါးအနက် မြစေတီဆရာတော်တစ်ပါး ပါဝင်ခဲ့ခြင်းဖြစ်ကြောင်း သိရသည်။
ထိုဘွဲ့တော်သည် အဂ္ဂမဟာပဏ္ဍိတ ဘွဲ့တံဆိပ်ရရှိထားပြီး၊အနည်းဆုံးသိက္ခာတော်(၄၀)ဝါရှိရမည်ဖြစ်ကာ ဗဟုသုတအကြားအမြင်များခြင်း၊ စာပေကျမ်းဂန်ရေးသားဖူးခြင်းစသည့် ဂုဏ်ထူးတို့နှင့် ပြည့်စုံသောဆရာတော်များအားအပ်နှင်းဆက်ကပ်သောဘွဲ့တံဆိပ်တော်ဖြစ်သည်ဟု သိရသည်။
ထို့ပြင် အဂ္ဂမဟာ သဒ္ဓမ္မဇောတိကဓဇ ဘွဲ့တံဆိပ်တော်(၅၄) ပါးဆပ်ကပ်ခံရသည့်အနက် မော်လမြိုင်မြို့ရှိ ဆင်ဖြူဆရာ တော်ဘုရားကြီးက ထပ်မံ အပ်နှင်းဆက်ကပ်ခံရကြောင်း သိရသည်။
ထို ဘွဲ့တံဆိပ်တော်သည် စာပေသင်ကြားပေးခြင်း၊ တရားဟောကြားခြင်း၊ အခြားနည်းဖြင့်ဖြစ်စေ ဗုဒ္ဓသာသနာနုဂ္ဂဟဝင် အနည်းဆုံးဦးရေ (၁၀၀) ရရှိအောင် စီမံဆောင်ရွက်ခဲ့ခြင်း (သို့မဟုတ်) ဗုဒ္ဓသာသ နာထွန်းကားမှုအားနည်းသော ဒေသများ၌ နှစ်(၂၀) သာသနာပြုခဲ့ခြင်း (သို့မဟုတ်) သာသနာတော်အား ကျေးဇူးများသော ဗုဒ္ဓဘာသာဆိုင်ရာ စာပေကျမ်းဂန် အနည်းဆုံး (၁၀) အုပ်ကို ရေးသား ရိုက်နှိပ် ထုတ်ဝေခဲ့ခြင်း (သို့မဟုတ်) အခြေခံဗုဒ္ဓဘာသာသင်တန်း (သို့မဟုတ်) ဘုန်းတော်ကြီးသင်ပညာရေး အနည်းဆုံး (၁၅)နှစ် သင်ကြားပေးခဲ့ခြင်း (သို့မဟုတ်) ဘုရားစေတီ တည်ထားကိုးကွယ်ခြင်း၊ သာသနိကအဆောက်အဦများ တည်ဆောက်ပြုပြင်မွမ်းမံခြင်းနှင့် ပရဟိတလုပ်ငန်းများ ထူးခြားစွာ ဆောင်ရွက်ခဲ့သည့် ဆရာတော်များကို ဆက်ကပ်ခြင်းဖြစ်ကြောင်း သိရသည်။
သာသနာတော်ဆိုင်ရာ ဘွဲ့တံဆိပ်တော်များကို ယမန်နေ့ ဇန်နဝါရီ (၄) ရက်တွင် ကျရောက်သည့် (၇၇)နှစ်မြောက် လွတ်လပ်ရေးနေ့ အထိမ်းအမှတ်အဖြစ် ဆက်ကပ်လှူဒါန်းအပ်နှံခဲ့ခြင်းလည်းဖြစ်သည်။
ဘွဲ့တော်များကို ဆရာတော်ကြီးများ၊ ဂန္ထဓုရပရိယတ္တိဝန်ဆောင် စာချဆရာတော်များ၊ ဝိပဿနာဓုရ ပဋိယတ္တိဝန်ဆောင် ကမ္မဋ္ဌာန်းနည်းပြဆရာတော်များ၊ နယ်လှည့်ဓမ္မက ထိကနှင့် ပြည်တွင်း/ပြည်ပ သာသနာပြုပုဂ္ဂိုလ်များ၊ ဗုဒ္ဓသာသနာတော်ကို ပစ္စည်းလေးပါးဖြင့်ထူးခြားစွာ ထောက်ပံ့လှူဒါန်းနေကြသည့် ပုဂ္ဂိုလ်များအား ဆက်ကပ်လှူဒါန်းအပ်နှံခဲ့ခြင်းဖြစ်သည်။