မြို့ပြဒေသများတွင် အပူလှိုင်းဒဏ်ခံစားနေရသည့်အပေါ် ဆောလျင်စွာတုန့်ပြန်နိုင်ရေးဆိုင်ရာလုပ်ငန်းစဉ် ဆွေးနွေးပွဲသို့ မြန်မာနိုင်ငံကြက်ခြေနီအသင်းက တက်ရောက်ဆွေးနွေးခဲ့ကြောင်း သိရသည်။
ယင်း ဆွေးနွေးပွဲကို စင်ကာပူနိုင်ငံ၌ ယခုလ ဇန်နဝါရီ (၇)ရက်မှ (၁၀)ရက်အထိ လေးရက်ကြာ ကျင်းပပြုလုပ်ခဲ့ခြင်းဖြစ်ပြီး မြန်မာနိုင်ငံကြက်ခြေနီအသင်း ကိုယ်စားလှယ်အဖြစ် ဘေးအန္တရာယ်ဆိုင်ရာစီမံခန့်ခွဲမှုဌာန ညွှန်ကြားရေးမှူးဒေါ်မိုးသီတာဝင်း တက်ရောက်ခဲ့ကြောင်း သိရသည်။
ဆွေးနွေးပွဲအတွင်း မြို့ပြဒေသများအတွင်း ခံစားရသည့် အပူလှိုင်းဒဏ်ကို ဆောလျင်စွာတုန့်ပြန်ရေးလုပ်ငန်းစဉ်များ (Urban Heatwave Simplified Early Action Protocol) အပေါ် မြန်မာနိုင်ငံကြက်ခြေနီအသင်းမှ ဆောင်ရွက်လျက်ရှိသည်များကို အသင်းကိုယ်စားလှယ်က ရှင်းလင်းတင်ပြခဲ့ပြီး တက်ရောက်လာသူများနှင့် အမြင်ချင်း ဆွေးနွေး ဖလှယ်ခဲ့ကြောင်း သိရသည်။
အဆိုပါ ဆွေးနွေးပွဲသို့ အာရှ- ပစိဖိတ်ဒေသတွင်းနိုင်ငံအစိုးရကိုယ်စားလှယ်များ၊ အမျိုးသားကြက်ခြေနီ/လခြမ်းနီအသင်းများ၊ UN agencies များနှင့် INGOs များ၊ နိုင်ငံတကာသတင်းမီဒီယာများ၊ သုတေသနနှင့် တက္ကသိုလ်များမှ ကိုယ်စားလှယ်များ တက်ရောက်ခဲ့ကြကြောင်း မြန်မာနိုင်ငံကြက်ခြေနီအသင်းက ယနေ့တွင် အသိပေးထုတ်ပြန်ထားသည်။