မေမေများကို လက်ဆောင်ပေးရန် ရည်ရွယ်ချက်ဖြင့် လက်မှုအနုပညာလက်ရာများ၊ မြန်မာ့ရိုးရာအစားအစာများကို အမေများနေ့ဖြစ်သည့် ပြာသိုလပြည့်နေ့၊ ဇန်နဝါရီလ (၁၃)ရက် နေ့လယ်ပိုင်းက မုံရွာမြို့၊ ကျောက်ကာလမ်း၊ ဝါစက်ဝင်းရှေ့တွင် ရောင်းချပေးခဲ့သည်။
“ဒီပွဲလေးလုပ်တာဟာ ဝါသနာတူတဲ့ သူတွေစုပြီး အမေများနေ့တစ်ရက်တည်း မေမေတွေလက်ဆောင်ပေးဖို့ရည်ရွယ်ချက်နဲ့ ရောင်းပေးတာပါ။ ဒီလိုပွဲလုပ်တာ ပထမဆုံးအကြိမ်ပါ။ အရင်ကလုပ်ခဲ့တာမရှိဘူး။ အခုမှဝါသနာတူသူငယ်ချင်းတွေစုပြီး သွားရောင်းကြမယ်ဆိုပြီးစိတ်တူကိုယ်တူလာရောင်းဖြစ်ကြတာပါ။ အခုလာမယ့်ချစ်သူများနေ့မှာ ရောင်းဖြစ်ကြမလားဆိုတာတိုင်ပင်နေကြပါတယ်”ဟု မသက်ထားမောင် (ဒေါ်ကြီးရွှေ မြန်မာ့ရိုးရာအစားအစာ)က ပြောသည်။
အမေများနေ့အထိမ်းအမှတ် ဈေးရောင်းပွဲတွင် မြေစာဥဆ နွင်းမကင်း၊ ရွှေကြည်ပူတင်း၊ သီးစုံဆနွင်းမကင်း၊ အုန်းနို့ကျောက်ကျော၊ သာခွေယိုင်၊ အုန်းနို့ငှက်ပျောပေါင်း၊ ကလိန့်စေ့အုန်းနို့ပေါင်း၊ ပင်လယ်ရေခူသုပ်၊ ငပိ ၊ငါးခြောက်၊ ပုစွန် ခြောက်၊ ဘိတ်ဒေသထွက် အခြောက်အခြမ်းများ၊ Clay Art Mug ၊ငှက်ပျောပေါင်း၊လက်ဆောင်ပန်းစည်းမျိုးစုံ၊ ချည်ထည်ပန်းထိုးဝမ်းဆက်များ၊ ချစ်စရာ ချည်ပန်းထိုး ခေါင်းစည်း ကြိုးလေးများ၊ ချည်ပန်းထိုး အမွှေစိန် ခေါင်းစည်းပဝါများ၊ ချစ်စရာကောင်းတဲ့ Crochet လက်ရာများကို နေ့လယ် (၁၂) နာရီမှ ညနေ(၄)နာရီအထိ ရောင်းချပေးခဲ့ကြသည်။
“မေမေ့ အတွက် ပိုက်ဆံပန်းစည်းပေးဖို့ဝယ်တာပါ။ မေမေတွေနဲ့ ဆိုင်တဲ့ကံကောင်းစေတဲ့ နေကြာပန်းလို အရုပ်လေးတွေ ဖန်တီးထားတာတွေ့ရတယ်။ ကလေ-းတွေ သင်နေတဲ့ Clay Art လို့ခေါ်တဲ့ ရွံ့ တစ်မျိုးနဲ့ ဖန်တီးရတဲ့ အရုပ်ကလေးတွေ၊ လက်ဝတ်လက်စားလေးတွေလည်းရောင်းပေးနေတာတွေ့ရပါတယ်”ဟု ဈေးဝယ်လာသူ အမျိုးသမီးက ပြောသည်။
အမေများနေ့ အထိမ်းအမှတ် ဈေးရောင်းပွဲကို ဒေါ်ကြီးရွှေမြန်မာ့ရိုးရာအစားအစာ ၊ Craftlife Myanmar၊ Foodie Thet ၊ Suprise Gift in Monywa ၊ Pann Ei Phyu ၊ 88 PAN Burmese Cotton ၊ Karkar နှင့် တောင်ပင်လယ် တို့ပူးပေါင်းရောင်းချကြခြင်းဖြစ်သည်။