ပဲခူးတိုင်း၊ ပဲခူးမြို့တွင် ဇန်နဝါရီ ၁၃ ရက်ည ၁၂ နာရီ ၄၀ မိနစ်ခန့်က ရေခဲသေတ္တာအားသွယ်တန်းထားသည့် မိန်းထုတ်အပူလွန်ကဲရာမှ နေအိမ်(၂) လုံး မီးလောင်ကျွမ်းခဲ့မှုဖြစ်ပွားခဲ့ကြောင်း မီးသတ်တပ်ဖွဲ့နှင့်ဒေသခံများထံမှ သိရသည်။
ပဲခူးမြို့၊ ကလျာဏီရပ်ကွက်၊ ကလျာဏီ(၅) လမ်းရှိ အမျိုးသမီးတစ်ဦးပိုင်ဆိုင်သည့် နေအိမ်တစ်လုံး၏ မီးဖိုချောင်အတွင်းထားရှိသော ရေခဲသေတ္တာအားသွယ်တန်းထားသည့် မိန်းထုတ်အပူလွန်ကဲရာမှ နေအိမ်ထံရံအားမီးကူးစက်လောင်ကျွမ်းခဲ့ပြီး ဘေးချင်းကပ်မှ ၎င်း၏မိခင်ဖြစ်သူပိုင်ဆိုင်သော နေအိမ်တစ်လုံးကိုပါ ထပ်မံကူးစက်လောင်ကျွမ်းခဲ့ကြောင်း သိရသည်။
ထို့ကြောင့် ပဲခူးတိုင်းမီးသတ်ဦးစီးမှူးရုံး၊ ပဲခူးတိုင်း ခရိုင်/မြို့နယ်မီးသတ်စခန်းတို့မှတပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များနှင့်လူမှုကူညီရေးအသင်းဝင်များ၊ အခင်းဖြစ်နေရာအနီးနေသူများက ပူးပေါင်းငြှိမ်းသတ်ခဲ့ကြသည်။
ထိုသို့ ငြှိမ်းသတ်ခဲ့မှုကြောင့် နံနက် ၁၂ နာရီ ၅၀ မိနစ်တွင် မီးထိန်းနိုင်ခဲ့ပြီး နံနက် ၁၂ နာရီ ၅၅ မိနစ်တွင်မီးငြိမ်းသွားခဲ့ကာ ဖြစ်စဉ်ကြောင့် နေအိမ် (၂)လုံးမှာ ပျက်စီးဆုံးရှုံးသွားခဲ့၍ မီးသတ်တပ်ဖွဲ့တာဝန်ရှိသူများက စစ်ဆေးခဲ့ကြကြောင်း သိရသည်။