နေပြည်တော်၌ ကျင်းပပြုလုပ်မည့် ပြည်ထောင်စုအဆင့် MSME ထုတ်ကုန်ပြပွဲနှင့် ပြိုင်ပွဲ၌ တနင်္သာရီတိုင်းဒေသကြီးမှ အသေးစား၊ အငယ်စား၊ အလတ်စား လုပ်ငန်းရှင်များမှလည်း ဝင်ရောက်ယှဉ်ပြိုင်သွားမည်ဖြစ်ကြောင်း တိုင်းဒေသကြီး MSME အေဂျင်စီ အစည်းအဝေးမှ သိရသည်။
ပြည်ထောင်စု အဆင့် MSME ထုတ်ကုန်ပြပွဲနှင့် ပြိုင်ပွဲပြသယှဉ်ပြိုင်နိုင်ရေး တိုင်းဒေသကြီး MSME အေဂျင်စီ အစည်းအဝေး (၁/၂၀၂၅)ကို ဇန်နဝါရီ (၁၄)ရက်က ထားဝယ်မြို့၊ တနင်္သာရီတိုင်းဒေသကြီး အစိုးရအဖွဲ့ရုံး၊ အစည်းအဝေးခန်းမ၌ ကျင်းပခဲ့ခြင်းဖြစ်သည်။
တိုင်းဒေသကြီးအနေဖြင့် ပြည်ထောင်စုအဆင့် MSME ထုတ်ကုန်ပြပွဲနှင့်ပြိုင်ပွဲ အောင်မြင်စွာ ဝင်ရောက်ပြသယှဉ်ပြိုင်နိုင်ရေး တိုင်းဒေသကြီးအဆင့် အေဂျင်စီအဖွဲ့ဝင်များ အနေဖြင့် ဝိုင်းဝန်းပူးပေါင်းဆောင်ရွက်ပေးကြရန် လိုအပ်ကြောင်း တိုင်းဒေသကြီး အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီ ဥက္ကဋ္ဌ၊ တိုင်းဒေသကြီးစီးပွားရေးရာဝန်ကြီး ဦးမောင်ကြီးက ပြောကြားခဲ့သည်။
ပြည်ထောင်စုအဆင့် MSME ထုတ်ကုန်ပြပွဲနှင့် ပြိုင်ပွဲအား (၇၈)နှစ်မြောက် ပြည်ထောင်စုနေ့ကို ဂုဏ်ပြုသောအားဖြင့် နေပြည်တော် ၊ တပေါင်းကွင်း၌ ဖေဖော်ဝါရီ (၁၀)ရက်မှ(၁၄) ရက်အထိ ကျင်းပပြုလုပ်သွားမည် ဖြစ်ကြောင်း သိရသည်။
တနင်္သာရီတိုင်း ဒေသကြီးမှ MSME ထုတ်ကုန်ပြိုင်ပွဲတွင် အသေးစားလုပ်ငန်းရှင် (၁)ဦးက ကိုကိုးထုတ်ကုန်၊ အငယ်စားလုပ်ငန်းရှင်(၁)ဦးက ရိုးရာချည်ထည်၊ အလတ်စားလုပ်ငန်းရှင်(၁)ဦးက ပုလဲထုတ်ကုန်၊ OROP ထုတ်ကုန်များအနေဖြင့်လုပ်ငန်းရှင်(၃)ဦး က ရေထွက်ကုန်၊ ရော်ဘာထုတ်ကုန်၊ ငှက်သိုက်ထုတ်ကုန်များ ဝင်ရောက်ယှဉ်ပြိုင်သွားမည်ဖြစ်ကြောင်း သိရသည်။
MSME ထုတ်ကုန်ပြပွဲတွင် ပြည်တွင်းကုန်ကြမ်းသုံး ထုတ်ကုန်များအနေဖြင့် ရိုးရာချည်ထည်ထုတ်ကုန်(၄)မျိုး၊ စိုက်/မွေးအခြေခံ ထုတ်ကုန်များအနေဖြင့် ပုလဲထုတ်ကုန် (၅)မျိုး၊ ကို ကိုးစားသောက်ကုန် (၆)မျိုး၊ မောတောင် ကော်ဖီထုတ်ကုန် (၅)မျိုး၊ သီဟိုဠ်ထုတ်ကုန် (၂)မျိုး၊ ကွမ်းသီးထုတ်ကုန် (၃) မျိုး၊ ပြည်ပပို့ကုန်များ အနေဖြင့် ရေထွက်ကုန်(၇)မျိုး၊ ရော်ဘာထုတ်ကုန်(၃)မျိုး၊ OROP ထုတ်ကုန်များနှင့် ငှက်သိုက်ထုတ်ကုန်(၂၂)မျိုး၊ ရေထွက်ကုန် (၆) မျိုး၊ ရော်ဘာထွက်ကုန် (၃)မျိုးကို လုပ်ငန်းရှင် (၁၀)ဦးက ထုတ်ကုန်(၆၆)မျိုးအား ပြသရောင်းချသွားမည်ဖြစ်ကြောင်း သိရသည်။
အစည်းအဝေးတွင် တိုင်းဒေသကြီး အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီ တွဲဖက်အတွင်းရေးမှူးက ပြည်ထောင်စုအဆင့် MSME ထုတ်ကုန်ပြပွဲနှင့် ပြိုင်ပွဲတွင် ပြသရောင်းချမည့် ထုတ်ကုန်များနှင့် ပြိုင်ပွဲဝင် MSME လုပ်ငန်းရှင်များ စာရင်း တင်ပြပြီး ပြိုင်ပွဲဝင် MSME လုပ်ငန်းရှင်များအား တိုင်းဒေသကြီးအဆင့် ဆန်ကာတင်ရွေးချယ်နိုင်ရန် အမှတ်ပေးစည်းမျဉ်းများနှင့် ပတ်သက်၍ ရှင်းလင်းတင်ပြခဲ့သည်။
ဆက်လက်၍ တိုင်းဒေသကြီး MSME အေဂျင်စီအဖွဲ့ဝင်များက ဖြည့်စွက်ဆွေးနွေးခဲ့ကြပြီး တိုင်းဒေသကြီး အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုး တက်ရေးအေဂျင်စီ ဥက္ကဋ္ဌ၊ တိုင်းဒေသကြီး စီးပွားရေးရာဝန်ကြီးက ညှိနှိင်းဆောင်ရွက်ပေးခဲ့ကြောင်း သိရသည်။