အကြမ်းဖက်သမားများ၏တိုက်ခိုက်မှုများကြောင့် ယာယီနေရပ်စွန့်ခွာနေရသူများကို အ မျိုးသားသဘာဝဘေးအန္တရာယ်ဆိုင်ရာစီမံခန့်ခွဲရေးရန်ပုံငွေမှထောက်ပံ့မှုများပြုလုပ်ပေးသွားမည့် အခြေအနေနှင့်ပတ်သက်၍ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က ဇန်နဝါရီ ၁၇ ရက်နံနက်ပိုင်းတွင် နစက ဥက္ကဋ္ဌရုံး၌ကျင်းပသည့် ပြည်ထောင်စုအစိုးရအဖွဲ့အစည်းအဝေးတွင် ထည့်သွင်းပြောကြားခဲ့သည်။
” သဘာဝဘေးအန္တရာယ်ကျရောက်မှုမှာပါဝင်တဲ့ အကြမ်းဖက်သမားတွေရဲ့ တိုက်ခိုက်မှုတွေကြောင့် ယာယီနေရပ်စွန့်ခွာနေကြရတဲ့ ပြည်သူတွေအတွက် အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲရေးရန်ပုံငွေကနေ လိုအပ်တဲ့ထောက်ပံ့မှုတွေဆောင်ရွက်ပေးဖို့စီစဉ်ဆောင်ရွက်နေပါတယ်”ဟု နစက ဥက္ကဋ္ဌက ပြောသည်။
လက်ရှိအချိန်၌ တိုင်းဒေသကြီးနှင့်ပြည်နယ်များ အလိုက် ယာယီနေရပ်စွန့်ခွာနေကြရသူများ၏ စာရင်းများကိုကောက်ယူလျက်ရှိသည်ဟု ပြောသည်။
အစိုးရအဖွဲ့ဝင်များအနေဖြင့် အခြေခံပြည်သူလူထုသက်သာချောင်ချိရေးအတွက် မဖြစ်မနေကြိုးပမ်းဆောင်ရွက်ကြရန် လိုအပ်သည်ဟု ၎င်းက မှာကြားသည်။
အလားတူပင် နိုင်ငံရေးသည် စီးပွားရေးမဟုတ်သော်လည်း စီးပွားရေးသည် နိုင်ငံရေးနှင့် နိုင်ငံ့အရေးပင်ဖြစ်၍ စီးပွားရေးအားကောင်းမှသာ နိုင်ငံရေး၊ စီးပွားရေး၊ လူမှုရေး၊ ကာကွယ်ရေး အဘက်ဘက်မှအားကောင်းလာမည်ဖြစ်ရာ နိုင်ငံ့စီးပွားရေးအားကောင်းအောင် အားလုံးမှဝိုင်းဝန်းဆောင်ရွက်သွားကြရမည်ဟုလည်း နစက ဥက္ကဋ္ဌက မှာကြားခဲ့သည်။