မြို့တော်၏ ခရိုင်အားလုံးတွင် အမှုန်အမွှားပါဝင်မှုမြင့်တက်နေသော လေထုညစ်ညမ်းမှု ပိုမိုဆိုးဝါးလာခြင်းကို တုန့်ပြန်ဆောင်ရွက်မှုအဖြစ် ဘန်ကောက်တွင် ရက်သတ္တပတ် အခမဲ့ အများပြည်သူသယ်ယူပို့ဆောင်ရေးအစီအစဉ်ဆောင်ရွက်ရန် ထိုင်းဝန်ကြီးချုပ် ပေတုံတန် ရှင်နာဝပ်ထရာက အမိန့်ပေးခဲ့သည်။
ဝန်ကြီးချုပ်သည် ဘန်ကောက်တွင် လေထုအတွင်း (PM 2.5) အမှုန်အမွှားပါဝင်မှုအဆင့် မြင့်တက်နေမှုနှင့်ပတ်သက်၍ ဝန်ကြီးဌာနနှင့် သက်ဆိုင်ရာဌာနများက ကိုင်တွယ်ဖြေရှင်းစေလိုသည်ဟု ဒုတိယဝန်ကြီးချုပ်လည်းဖြစ်သည့် ပို့ဆောင်ရေးဝန်ကြီး Suriya Jungrungreangkit က သောကြာနေ့တွင် ပြောကြားခဲ့သည်။
ယင်းအတွက် ဇန်နဝါရီ ၂၅ ရက်မှ ၃၁ ရက်အထိ အများပြည်သူကို ဘတ်စ်နှင့် လျှပ်စစ်ရထားများအား အခမဲ့ဝန်ဆောင်မှုပေးသွားမည်ဖြစ်သည်ဟု မစ္စတာ Suriya က ပြောဆိုသည်။ လျှပ်စစ်ရထားခရီးသည်များအတွက် အခမဲ့စီးနင်မည်ဖြစ်သည်ဟု မစ္စတာ Suriya က ပြေးခွင့်ပြုရန် Bangkok Transit System Plc(BTS) ၊ Bangkok Expressway နှင့် Metro Public Company(BEM) တို့၏ အော်ပရေတာများနှင့် သူ ညှိနှိုင်းဆောင်ရွက်ခဲ့သည်ဟု ဆိုသည်။ ထို့အပြင် Bangkok Mass Transit Authority(BMTA) ကလည်း သီတင်းတစ်ပတ်လုံး အခမဲ့ဘတ်စ်ကားဝန်ဆောင်မှုများပေးရန် သဘောတူခဲ့သည်ဟုလည်း ဆိုခဲ့သည်။
ယင်းကာလအတွင်း အခမဲ့ သယ်ယူပို့ဆောင်မှုပေးသော အော်ပရေတာများကို နစ်နာကြေးပေးရန် အစိုးရက အစီအမံများ ရေးဆွဲသွားမည်ဖြစ်သည်။ အဆိုပါရည်ရွယ်ချက်အတွက် အစိုးရအဖွဲ့၏ ထောက်ခံချက်ဖြင့် ဘတ်သန်း ၁၄၀ ခန့် ဗဟိုရန်ပုံငွေ ခွဲဝေပေးသွားမည်ဖြစ်သည်ဟု မစ္စတာ Suriya က ပြောဆိုသည်။ အစီအစဉ်အတွက် အစိုးရအဖွဲ့ဝန်ကြီးအားလုံးက ထောက်ခံမည်ဟု ယုံကြည်ကြောင်းလည်း ဆိုခဲ့သည်။
ဝန်ကြီးဌာနသည် မော်တော်ယာဉ် မီးခိုးထုတ်လွှတ်မှုကို စောင့်ကြည့်ရန် မြို့တော်တွင် စစ်ဆေးရေးဂိတ် ၈ ခု ဖွင့်လှစ်ထားသည်ဟု သိရသည်။
အခမဲ့သယ်ယူပို့ဆောင်ရေး ဝန်ဆောင်မှုများကို ၂၀ ရာခိုင်နှုန်းမှ ၃၀ ရာခိုင်နှုန်းကျော်အထိ အသုံးပြုကြလိမ့်မည်ဟု ယုံကြည်ကြောင်း မစ္စတာ Suriya က ပြောဆိုသည်။ အဆိုပါ ၇ ရက်တာကာလအပြီးတွင် အမှုန်အမွှားအဆင့် တိုးတက်ကောင်းမွန်လာခြင်းမရှိပါက ပဏာမခြေလှမ်းကို သက်တမ်းတိုးနိုင်ခြေရှိ မရှိ ပြန်လည်အကဲဖြတ်စဉ်းစားသွားမည်ဟု သူက ပြောဆိုသည်။
ဆွစ်ဇာလန်နိုင်ငံအခြေစိုက် IQAir ၏ အချက်အလက်များအရ သောကြာနေ့တွင် ဘန်ကောက်မြို့၏ လေထုအရည်အသွေးသည် ကမ္ဘာ့လေထုညစ်ညမ်းမှု စတုတ္ထမြောက်အဆိုးဆုံးမြို့အဖြစ် အဆင့်သတ်မှတ်ခံခဲ့ရသည်။
Ref: ဘန်ကောက်ပို့စ်