လှိုင်သာယာတွင် ရေစီးရေလာကောင်းမွန်ရေးသည် အဓိကဖြေရှင်းပေးရမည့်ကိစ္စဖြစ်၍ အလေးထားဆောင်ရွက်ရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မတ် ၁၄ ရက်နံနက်ပိုင်းက လှိုင်သာယာမြို့နယ်ရှိ လှိုင်သာယာဘုရင့်နောင်ပြည်သူ့ပန်းခြံအားကြည့်ရှုစစ်ဆေးစဥ် မှာကြားခဲ့ခြင်းဖြစ်သည်။
လှိုင်သာယာမြို့နယ်အတွင်း ရေစီးရေလာကောင်းမွန်စေရေး၊ လျှပ်စစ်မီးတိုင်များစနစ်တကျရှိစေရေး ဆောင်ရွက်ရာ၌ လုပ်ငန်းဆောင်ရွက်မှုများမှာ လိုအပ်ချက်များရှိနေ၍ ရေထွက်စနစ်များ စနစ်တကျကောင်းမွန်စေရန် ရေနုတ်မြောင်းများ၊ တံတားများကို သတ်မှတ်ချက်များနှင့်အညီ ရေစီးရေလာကောင်းမွန်အောင် ပြန်လည်ပြုပြင်ဆောင်ရွက်ရမည်ဟု မှာကြားသည်။
” လှိုင်သာယာမှာ ရေစီးရေလာကောင်းမွန်ရေးဟာ အဓိကဖြေရှင်းဆောင်ရွက်ပေးရမယ့်ကိစ္စတစ်ခုဖြစ်တာကြောင့် အလေးထားဆောင်ရွက်ရပါမယ်။ တစ်မြို့နယ်လုံးအတိုင်းအတာနဲ့ ရေဝင်ရေထွက်ကောင်းမွန်ရပါမယ်။ မိုးရာသီမရောက်ခင် ရေစီးရေလာကောင်းမွန်စေဖို့နဲ့ ရေထွက်ပေါက်တွေစနစ်တကျ ဖြစ်အောင်ဆောင်ရွက်ရပါမယ်”ဟု နစက ဥက္ကဋ္ဌက မှာကြားသည်။
ထို့ပြင် ရေစီးရေလာကောင်းမွန်ရေးလုပ်ငန်းများ ဆောင်ရွက်ရာတွင် အပိုင်းအလိုက်၊ လုပ်ငန်းဧရိယာအလိုက် တစ်ဆင့်ချင်းစနစ်တကျပြီးစီးအောင်ဆောင်ရွက်သွားရမည်ဖြစ်ကာ လှိုင်သာယာမြို့နယ်အတွင်း စက်ရုံ၊ အလုပ်ရုံအများအပြားရှိပြီး အလုပ်လုပ်ကိုင်ကြသူ အများအပြားနေထိုင်၍ ပလက်ဖောင်းများအဆင့်မီကောင်းမွန်ရန်လည်းလိုသည်ဟု မှာကြားသည်။
” မြို့နယ်အတွင်းစိမ်းလန်းစိုပြေရေး၊ သန့်ရှင်းသာယာလှပရေးတွေအတွက် စနစ်တကျစီမံကိန်းချဆောင်ရွက်ရပါမယ်။ မြို့နေပြည်သူလူထုနဲ့ကိုက်ညီတဲ့ လူနေမှုပတ်ဝန်းကျင်ကောင်းကို ဖော်ဆောင်ပေးနိုင်ရပါမယ်။ ရန်ကုန်မြို့တော်ဧရိယာအတွင်းတည်ရှိတဲ့အတွက် အဆင့်မီတဲ့ မြို့ဖြစ်စေဖို့၊ မြို့ပြဖွံ့ဖြိုးတိုးတက်ရေးလုပ်ငန်းတွေကို ဆက်လက်အကောင် အထည်ဆောင်ရွက်ပေးသွားရပါမယ်”ဟု နစက ဥက္ကဋ္ဌက မှာကြားသည်။
နစက ဥက္ကဋ္ဌအား လှိုင်သာယာဘုရင့်နောင်ပြည်သူ့ပန်းခြံအား ဘက်စုံသုံးအဆောက်အဦများ၊ ပျော်ပွဲရွှင်ပွဲကျင်းပရန်နေရာများ၊ ယာဉ်ရပ်နားရန်နေရာများ၊ ကစားကွင်းများ၊ ရေကူးကန်များအပါအဝင် အများပြည်သူအပန်းဖြေရန်နေရာများဆောင်ရွက်ပြီးစီးမှု၊ ပန်းခြံအတွင်းပျော်ပွဲရွှင်ပွဲများကျင်းပခဲ့မှုနှင့် ပြည်သူအများအပြား ပျော်ရွှင်စွာလာရောက်ဆင်နွဲခဲ့မှုများ၊ လှိုင်သာယာမြို့နယ်အတွင်းသန့်ရှင်းသာယာလှပရေးဆောင်ရွက်လျက်ရှိမှုတို့ကို ရန်ကုန် တိုင်းဝန်ကြီးချုပ်နှင့် ရန်ကုန်မြို့တော်ဝန်တို့က ရှင်း လင်းတင်ပြခဲ့ကြသည်။