အစဥ်အလာရှိသည့် သတင်းအချက်အလက်နည်းပညာတက္ကသိုလ်၌ နိုင်ငံအတွက်အကျိုးပြုနိုင်သည့် သင်ကြားမှုများကို ဆက်လက်ဆောင်ရွက်ပေးစေလိုသည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယမန်နေ့ မတ် ၁၄ ရက်နံနက်ပိုင်းက ရန်ကုန်တိုင်း၊ လှိုင်မြို့နယ်ရှိ သိပ္ပံနှင့်နည်းပညာဝန်ကြီးဌာန၊ အဆင့်မြင့်သိပ္ပံနှင့် နည်း ပညာဦးစီးဌာန၏ သတင်းအချက်အလက်နည်းပညာတက္ကသိုလ်အားကြည့်ရှုစစ်ဆေးစဥ် မှာကြားခဲ့ခြင်းဖြစ်သည်။
တက္ကသိုလ်အတွင်း ကျောင်းသား၊ ကျောင်းသူများ ၏ အဆောင်များနေရာချထားရာတွင် စနစ်တကျဖြစ်ရန်လိုပြီး သင်ကြားရေးဝန်ထမ်းများ၏ အိမ်ယာများ၊ အဆောင်များကိုလည်း စနစ်တကျထားရှိရမည်ဖြစ်ကာ ကျောင်းသား၊ ကျောင်းသူများကိုယ်လက်လှုပ်ရှားအားကစားပြုလုပ်နိုင်ရန်လည်း စီမံဆောင်ရွက်ပေးရမည်ဟု မှာကြားသည်။
” သတင်းအချက်အလက်နည်းပညာတက္ကသိုလ်ဟာ အစဉ်အလာရှိတဲ့ တက္ကသိုလ်တစ်ခုဖြစ်တာကြောင့် နိုင်ငံအတွက်အကျိုးပြုနိုင်တဲ့ သင်ကြားမှုတွေကိုဆက်လက်ဆောင်ရွက်ပေးစေလိုပါတယ်”ဟု နစက ဥက္ကဋ္ဌကမှာကြားသည်။
ထို့ပြင် နစက ဥက္ကဋ္ဌအား တက္ကသိုလ်ပါမောက္ခချုပ် ဒေါက်တာစောစန္ဒာအေးက ရန်ကုန်ကွန်ပျူတာတက္ကသိုလ်ကို သတင်းအချက်အလက်နည်းပညာတက္ကသိုလ်အဖြစ်ပြောင်းလဲခဲ့မှုနှင့် တက္ကသိုလ်၏ သမိုင်းကြောင်းဆိုင်ရာအချက်အလက်များ၊ ဖွဲ့စည်းပုံ၊ ဘာသာရပ်အလိုက်၊ ပညာသင်နှစ်အလိုက်သင် ကြားပေးလျက်ရှိမှု၊ ပြည်တွင်း၊ ပြည်ပ ဘွဲ့လွန်သင်တန်းတက်ရောက်ရန် ပညာတော်သင်များရွေးချယ်စေလွှတ်လျက်ရှိမှု၊ တိုင်းနှင့် ပြည်နယ်အလိုက် ကျောင်းသား၊ ကျောင်းသူများတက်ရောက်ပညာသင်ကြားလျက်ရှိမှုတို့ကို ရှင်းလင်းတင်ပြခဲ့သည်။
ထို့အတူ နည်းပညာအသုံးပြုသင်ကြားသင်ယူမှုနှင့် စီမံခန့်ခွဲမှုစနစ်ဖြင့် သင်ကြားပေးလျက်ရှိမှု၊ ကျောင်းသား၊ ကျောင်းသူများလုပ်ငန်းခွင်သင်တန်း စေလွှတ်မှုနှင့် အလုပ်အကိုင်ရရှိမှု၊ International Conference on Advanced Information Technologies (ICAIT) များတင်သွင်းနိုင်မှု၊ သတင်းအချက်အလက်နည်းပညာတက္ကသိုလ်အဆောက်အဦတည်ဆောက်ပြီးစီးမှုတို့ကိုလည်း ရှင်းလင်းတင်ပြခဲ့ပြီး သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်မှလည်း ဖြည့်စွက်ရှင်းလင်းတင်ပြခဲ့သည်။
ထို့နောက် နစက ဥက္ကဋ္ဌမှ သတင်းအချက်အလက်နည်းပညာတက္ကသိုလ်အတွင်းလှည့်လည်၍ စာကြည့်တိုက်အတွင်းရှိ Digital Library စနစ်၊ လေ့ဘကျင့်ရေးအထောက်အကူပြုစနစ်၊ Al နည်းပညာသုံးသင်ကြားမှု၊ သင်ယူမှုအထောက်အကူပြုစနစ်တို့ဖြင့်သင်ကြားပို့ချပေးနေမှုများ၊ လက်တွေ့ခန်း K-LAB အတွင်း ကျောင်းသား၊ ကျောင်းသူများအား လက်တွေ့လေ့ကျင့်သင်ကြားပေးလျက်ရှိမှုများနှင့် သင်ကြားမှု၊ သင်ယူမှုအထောက်အကူပြုခန်းများ ထည့်သွင်းတည်ဆောက်ထားရှိမှုတို့ကိုကြည့်ရှုစစ်ဆေးခဲ့သည်။