ရန်ကုန်မြို့နှင့် ဒလမြို့ကို ဆက်သွယ်ရန် တည်ဆောက်နေသည့် ဒလတံတားနှင့် မလွတ်ကင်း၍ ဖျက်သိမ်းလိုက်ရသည့် ဒလမြို့ရှိ နာရီစင်ကို ပြောင်းရွှေ့တည်ဆောက်ပေးမည်ဟု သိရသည်။
ယင်းနာရီစင်သည် ယခင်က ဒလမြို့လယ်ခေါင်၊ ကမာကဆစ်ဈေးအနီးရှိခဲ့ခြင်းဖြစ်ပြီး သက်တမ်းအားဖြင့် နှစ်သုံးဆယ်ကျော်ခဲ့ပြီ ဖြစ်ကြောင်း သိရသည်။
“ဒလ သင်္ဘောဆိပ်နားက အရင်က မီးတိုင်ရှိတဲ့ အဝိုင်းနေရာကို ပြောင်းရွှေ့ဆောက်ပေးမယ်တော့ ကြားတယ်” ဟု ဒလမြို့ခံတစ်ဦးက ဆိုသည်။
သို့သော် စတင်ဆောက်လုပ်မည့် အချိန်နေ့ရက်ကိုမူ အတိအကျ မသိရှိရသေးပေ။
ကိုးရီးယား-မြန်မာ ချစ်ကြည်ရေးအဖြစ် တည်ဆောက်နေသည့် ရန်ကုန်-ဒလတံတားသည် ၂၀၂၄ ခုနှစ်တွင် အပြီးတည်ဆောက်ရန် သတ်မှတ်ထားသော်လည်း ကိုဗစ်ကပ်ရောဂါအပါအဝင် အကြောင်းအမျိုးမျိုးကြောင့် စီမံကိန်းနောက်ကျနေရခြင်းဖြစ်ပြီး လက်ရှိတွင် တံတားတည်ဆောက်မှု ရာနှုန်းပြည့် ပြီးစီးရန် အနည်းငယ်သာ ကျန်ရှိတော့သည်။
ယင်းတံတားစီမံကိန်းကို အမေရိကန်ဒေါ်လာ (၁၅၇ ဒသမ ၈၃၃) သန်း အကုန်ကျခံကာ အဓိက ကန်ထရိုက်တာအဖြစ် ကိုရီးယားနိုင်ငံ၏ GS Engineering Group မှ တာဝန်ယူတည်ဆောက်ခြင်းဖြစ်ကြောင်း တံတားဦးစီးဌာနမှ သိရသည်။
တံတားကြီး၏ ရေလယ်ပိုင်း တာဝါတိုင်နှစ်တိုင်၏ အကွာအဝေးသည် မီတာ (၃၇ဝ) ခန်းဖွင့်အကျယ်ရှိပြီး တံတား၏ ဒလဘက်ခြမ်း ချဉ်းကပ်တံတား အရှည်မှာ (၅၇၇)မီတာနှင့် ရန်ကုန်ဘက်ခြမ်း ချဉ်းကပ်တံတားအရှည်မှာ (၆ဝ၁) မီတာရှိကြောင်း သိရသည်။
ရေလယ်ပိုင်း ပင်မတံတားအရှည်သည် မီတာ (၆၉ဝ) ရှိပြီး စုစုပေါင်း တံတားရှည်သည် (၆၁၄၄) ပေနှင့် ရေလမ်းကင်း လွတ်ခွင့်အမြင့်သည် ၄၉ မီတာ ( ၁၆ဝ ပေ ) ရှိကာ တစ်ဖက်လျှင် (၄) မီတာအကျယ် လူသွားပလက်ဖောင်းပါရှိကြောင်း သိရသည်။
အဆိုပါ တံတားပြီးစီးသည့်အခါ တံတားပေါ်တွင် မောင်းနှင်မည့် မော်တော်ယာဉ်များကို တံတား ချဉ်းကပ်လမ်းပိုင်းတွင် တစ်နာရီလျှင် ကီလိုမီတာ (၅၀) နှုန်း၊ တံတား၏ ဆင် ခြေလျှောအပိုင်းများတွင် တစ်နာရီလျှင် ကီလိုမီတာ (၃၀) နှုန်း ဖြင့် မောင်းနှင်ခွင့်ပြုမည်ဖြစ်ကြောင်း သိရသည်။