ဝီဂါကိစ္စ ထိုင်းအစိုးရတာဝန်ရှိသူများကို အမေရိက,က ပိတ်ဆို့ အရေးယူ

ပြီးခဲ့သည့်လက ဝီဂါလူမျိုး ၄၀ ကို တရုတ်နိုင်ငံသို့ ပြန်လည်ပို့ဆောင်ရာတွင် ပါဝင်ပတ်သက်ခဲ့သည့် ထိုင်းအစိုးရ တာဝန်ရှိသူများကို ဗီဇာကန့်သတ်ပိတ်ပင်ကြောင်း အမေရိကန်နိုင်ငံခြားရေးဝန်ကြီး မာကို ရူဘီယိုက သောကြာနေ့တွင် ကြေညာခဲ့သည်။ အမေရိကန်အရာရှိများ၏ အဆိုအရ ဆက်ဖြစ်ပွားနေသည့် မျိုးသုဉ်း သတ်ဖြတ်သည့် လုပ်ရပ်တွင် နေရပ်ပြန်ပို့ခံရသူများသည် နှိပ်စက်ညှင်းပန်းမှုနှင့် ရင်ဆိုင်ရဖွယ်ရှိသည်ဟု ဆိုသည်။

အဆိုပါ ဝီဂါများသည် ၂၀၁၄ ခုနှစ်တွင် တရုတ်၏ ဖိနှိပ်မှုမှ လွတ်မြောက်လာပြီးနောက် ထိုင်းနိုင်ငံရှိ လူဝင်မှုကြီးကြပ်ရေး ထိန်းသိမ်းရေးစခန်းတွင် ထိန်းသိမ်းခံထားရခြင်းဖြစ်သည်။ ဖေဖော်ဝါရီ ၂၇ ရက်တွင် ၎င်းတို့ကို တရုတ်နိုင်ငံသို့ ပြန်ပို့ရန် ထိုင်းအစိုးရက ဆုံးဖြတ်ခဲ့မှုကြောင့် အမေရိကန်ပြည်ထောင်စု၊ ဥရောပ သမဂ္ဂ၊ ကုလသမဂ္ဂနှင့် နိုင်ငံတကာ လူ့အခွင့်အရေးအုပ်စုများက ဝေဖန်ခဲ့ကြသည်။

အမေရိက ဗီဇာပိတ်ပင်မှုသည် ဝီဂါများကို တရုတ်နိုင်ငံသို့ အတင်းအကျပ်ပြန်ပို့ရာတွင် တာဝန်ရှိသော သို့မဟုတ် ကြံရာပါဖြစ်သော ထိုင်းအစိုးရ အရာရှိများနှင့် သက်ဆိုင်မည်ဖြစ်သည်ဟု ရူဘီယိုက ပြောဆိုခဲ့ပြီး ပြန်ပို့ခံရသူများအနေဖြင့် နှိပ်စက်ညှင်းပန်းခံရမှုနှင့် ပျောက်ဆုံးမှုများ ကြုံတွေ့ရနိုင်သည်ဟု သူက ဆိုခဲ့သည်။

“တရုတ်အစိုးရ၏ ဝီဂါများကို မျိုးသုဉ်း သတ်ဖြတ်မှု၊ လူသားမျိုးနွယ်အပေါ် ကျူးလွန်သော ရာဇဝတ်မှုလုပ်ရပ်များ ကာလကြာရှည် လုပ်ဆောင်နေသောကြောင့် ကမ္ဘာတစ်ဝန်းမှ အစိုးရများအနေဖြင့် ဝီဂါနှင့် အခြားလူမျိုးအုပ်စုများကို တရုတ်နိုင်ငံသို့ အတင်းအကျပ်ပြန်မပို့ရန် ကျွနုပ်တို့ တောင်းဆိုသည်” ဟု အမေရိကန်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ရူဘီယိုက ပြောဆိုခဲ့သည်။

ထိုင်းအစိုးရ အရာရှိများ၏ မိသားစုဝင်များသည်လည်း အမည်ပျက်စာရင်းသွင်းခြင်းအရ အမေရိကသို့ ခရီးသွားလာခြင်း ပိတ်ပင်ခံရနိုင်သည်ဟု ထုတ်ပြန်ချက်တွင် ဆိုခဲ့သည်။

တားမြစ်ပိတ်ပင်ခံရမည့် အရာရှိအရေအတွက်နှင့် ပတ်သက်၍ အာအက်ဖ်အေ၏ မေးမြန်းချက်ကို နိုင်ငံခြားရေးဌာနက တုန့်ပြန်ဖြေကြားခြင်း မရှိပေ။ နိုင်ငံခြားရေးဌာနသည် ဗီဇာပိတ်ပင်ခံရသူများ၏ အမည်များကို အမေရိကန် လူဝင်မှုကြီးကြပ်ရေးဆိုင်ရာဥပဒေ၏ ကိုယ်ရေးကိုယ်တာစောင့်ထိန်းမှုအရဆိုကာ ထုတ်ဖော်ပြောဆိုလေ့မရှိပေ။ Ref:Benar News