ရှမ်းပြည်အရှေ့ပိုင်း၊ ကျိုင်းတုံမြို့၌ ယနေ့ မတ်လ (၂၀)ရက် နံနက်ပိုင်းအချိန်တွင် ရှမ်းတိုင်းရင်းသားများက စော်ဘွားဈေးနေ့ကို ကျင်းပပြုလုပ်ခဲ့ကြောင်း သိရသည်။
အဆိုပါ ဈေးရောင်းချမှုသည် စော်ဘွားများကို အမှတ်ရခြင်း၊ ပူဇော်ခြင်း အထိမ်းအမှတ်အဖြစ် တစ်နှစ်လျှင် တစ်ရက်သာ ခင်းကျင်းရောင်းချကြခြင်းဖြစ်ပြီး စော်ဘွားများ၏ အု တ်ဂူတွင် ပူဇော်ခြင်းများကိုလည်း လုပ်ဆောင်ခဲ့ကြကြောင်း သိရသည်။
စော်ဘွားဈေးကို လွိုင်မွေလမ်းရှိ စော်ဘွားကြီးများ အုတ်ဂူနောက်ကျောနေရာမှ ပါလျန်တံခါးအလွန် ခရိုင်အထွေထွေအုပ်ချုပ်ရေးမှူးရုံးရှေ့အထိလည်းကောင်း၊ ဈေးတန်းကြီးလမ်း ကောင်းမှူးခမ်း ဘုန်းကြီးကျောင်းလမ်းထောင့်မှ စော်ဘွားကြီး အုတ်ဂူရှေ့သို့ လည်းကောင်း၊ တစ်ဆက်တည်း EPC သွားလမ်းကွေ့အထိ စည်ကားသိုက်မြိုက်စွာ ခင်းကျင်း ရောင်းချခဲ့ကြောင်း သိရသည်။
စော်ဘွားဈေးနေ့ကို သက္ကရာဇ် ၇၃၀ ခုနှစ်၊ အေဒီ ၁၃၆၈ ခုနှစ် စော်ဘွား စင်စစ်ပန်းတု(ခ)စင်သတ္တ ချူရာဇာ လက်ထက်တွင် ကျိုင်းတုံမြို့ ရပ်ကွက်(၃)ရှိ အောင်မြေနန်းပန်းခြံသည် စော်ဘွားရေးဖြစ်ပြီး ၎င်းနယ်မြေကို အောင်မြေဟု သတ်မှတ်ထားကြောင်း ၊ ကျိုင်းတုံစော်ဘွားများ ခရီးထွက်လျှင်သော်လည်းကောင်း၊ စစ်ထွက်လျှင် သော်လည်းကောင်း၊ အဆိုပါ ဈေးနယ်မြေတွင် ညအိပ်၍ မှူးမတ်စစ်သည်များကို ရာထူးချီးမြှင့်ပေးခြင်း၊ လက်နက်နှင့် လူအင်အား စုဆောင်ခြင်းများပြုလုပ်၍ ပျော်ပွဲရွှင်ပွဲများ ကျင်းပပြီးမှ ထွက်ခွာလေ့ ရှိကြောင်း သိရသည်။
၁၆၃၂ ခုနှစ်တွင် ဈေးရောင်းဈေးဝယ်သူ များပြားလာကာ ရပ်ကွက်(၁)ရှိ မြို့မရေးသို့ ပြောင်းရွှေ့ခင်းကျင်း ရောင်းချခဲ့ခြင်းဖြစ်ကြောင်း သိရသည်။