အမေရိကန်နိုင်ငံက ပြည်နှင်သည့် မြန်မာနိုင်ငံသား နှစ်ဦးကို ပြန်လည်လက်ခံသွားမည်ဖြစ်ကြောင်း မြန်မာနိုင်ငံခြားရေးဝန်ကြီးဌာနက ထုတ်ပြန်အသိပေးထားသည်။
မြန်မာနိုင်ငံခြားရေးဝန်ကြီးဌာန၏ မတ်လ (၂၁) ရက် ထုတ်ပြန်ချက်တွင် ပြည်နှင်ခံရသူ မြန်မာနှစ်ဦးသည် မတ် (၁၉) ရက်နှင့် မတ် (၂၈)ရက်တွင် မြန်မာနိုင်ငံသို့ပြန်လည်ရောက်ရှိမည်ဖြစ်သည်။
ကမ္ဘာ့နိုင်ငံများအနေဖြင့် သက်ဆိုင်ရာနိုင်ငံ၏ အကျိုးစီးပွားကို ထိပါးသူ ဒါမှမဟုတ် ရာဇဝတ်မှုများ ကျူးလွန်ထားသူ တရားမဝင် ရွှေ့ပြောင်းရောက်ရှိသူ နိုင်ငံခြားသားများကို ဥပဒေကြောင်းအရ ပြည်နှင်မှုများကို ပြုလုပ်လေ့ရှိကြောင်းလည်း ထုတ်ပြန်ချက်၌ ဖော်ပြထားသည်။
ထိုနည်းတူ အမေရိကန်အစိုးရသစ်၏ ဦးစားပေး မူဝါဒများအရ လူဝင်မှုကြီးကြပ်ရေး စည်းမျဉ်းစည်းကမ်းများနှင့် ငြိ စွန်းသူများ၊ ပြစ်မှုကျူးလွန်ထားသည့် နိုင်ငံခြားသားများကို ပြည်နှင်ခြင်းများပြုလုပ်နေကြောင်းလည်း ထုတ်ပြန်ချက်တွင် ဆိုသည်။
ထို့ကြောင့် နိုင်ငံသားများအနေဖြင့် ပြည်ပသို့ တရားဝင်လမ်းကြောင်းမှသာ ထွက်ခွာကြရန်နှင့် ရောက်ရှိရာ နိုင်ငံတိုင်းတွင် သက်ဆိုင်ရာ ပြည်တွင်းဥပဒေများကို လိုက်နာကြရန် လိုအပ်ကြောင်း၊ အမိနိုင်ငံအတွင်း၌ ဥပဒေဘောင်အတွင်း နေထိုင်ခြင်းသည်သာ အကောင်းဆုံးဖြစ်ပါကြောင်း ယခု ပြည်နှင်ခံရမှုက ပြသလျက်ရှိကြောင်း နိုင်ငံခြားရေးဝန်ကြီး ဌာနက ထုတ်ပြန်ထားသည်။