နိုင်ငံတကာ ဝယ်လိုအား ကျဆင်းနေခြင်းနှင့် ပြည်တွင်းဝယ်လိုအားများ ကျဆင်းနေခြင်းတို့ကြောင့် မြန်မာနိုင်ငံဆန်စပါးအသင်းချုပ်အနေဖြင့် ဧပြီလနှင့် မေလတွင် စပါးတင်း သိန်း (၁၅၀) နှင့် ဧည့်မထဆန်အိတ် (၄) သိန်း ဝယ်ယူနိုင်ရေးကို ဆောင်ရွက်သွားမည်ဖြစ်ကြောင်း သိရသည်။
မတ်လ ၂၂ ရက်တွင် ကျင်းပပြုလုပ်သော မြန်မာနိုင်ငံဆန်စပါးအသင်းချုပ်၏ လုပ်ငန်းညှိနှိုင်း အစည်းအဝေးများ၊ ဆွေးနွေးပွဲများနှင့် စပ်လျဉ်း၍ သတင်းထုတ်ပြန်ချက်မှ သိရသည်။
လက်ရှိအခြေအနေတွင် နိုင်ငံတကာ ဝယ်လိုအား ကျဆင်း နေခြင်း၊ ပြည်တွင်းဝယ်လိုအားများ ကျဆင်းနေခြင်းအတွက် ဆန်စပါးဈေးကွက်အတွင်း ဧည့်မထ နွေစပါး စိုက်ပျိုးသော တောင်သူလယ်သမားများ အနေဖြင့် ဈေးနှုန်းကျဆင်းနေခြင်း နှင့် ရောင်းချရန် ခက်ခဲနေခြင်းတို့ကြောင့် စိုးရိမ်ပူပန်မှုများ ဖြစ်ပေါ်နေခြင်း အပေါ် မြန်မာနိုင်ငံ ဆန်စပါးအသင်းချုပ် အနေဖြင့် ပို့ကုန်ကုမ္ပဏီများ၊ အသင်းဝင် ဆန်စက်ကြီးများနှင့် ညှိနှိုင်း ပေါင်းစပ်၍ စပါးတင်း သိန်း (၁၅၀) နှင့် ဧည့်မထဆန်အိတ် (၄) သိန်း ဝယ်ယူရေး ကို ၂၀၂၅ ခုနှစ်၊ ဧပြီလနှင့် မေလတွင် ဆောင်ရွက်သွားမည် ဖြစ်သည်။
ထို့ကြောင့် စပါး/ ဆန် ရောင်းချရန် အခက်အခဲ ရှိပါက မြန်မာနိုင်ငံဆန်စပါးအသင်းချုပ် ရုံးဖုန်းနံပါတ် ဝ၁-၂၃၀၁၁၂၈-၂၉ ၊ ၀၁-၂၁၈၂၆၆-၆၈ သို့ ဆက်သွယ်နိုင်ကြောင်း အသိပေးထားသည်။
အလားတူ ၂၀၂၅-၂၀၂၆ ဘဏ္ဍာနှစ်တွင် ပေါင်းဆန်တန်ချိန် (၃) သိန်း တင်ပို့နိုင်ရေး လျာထားလျက် ပေါင်းဆန်စက် (၃၀) အား အဆင့်မြှင့်တင်ခြင်း၊ လိုအပ်သော ပံ့ပိုးကူညီမှုများ ဆောင်ရွက်ခြင်း၊ ပေါင်းဆန်ထုတ်လုပ်မှု ဖွံ့ဖြိုးတိုးတက်ရေးအတွက် ရေတိုရေရှည် ဆောင်ရွက်ရန် ကိစ္စရပ်များ အပေါ် ညှိနှိုင်းဆွေးနွေးခဲ့ကြောင်းလည်း သိရသည်။
ဆက်လက်၍ အသင်းချုပ်နှင့် MoU ရေးထိုးထားသည့် Solar Energy ကုမ္ပဏီ (၁၁)ခုနှင့် Export ဆောင်ရွက်လျက်ရှိသည့် ဆန်စက်ကြီးများတွင် Solar Energy စက်တပ်ဆင်အင်အား (၄၁.၅) မဂ္ဂါဝပ်ကို စတင် ဆောင်ရွက်နိုင်ရန် ညှိနှိုင်းဆွေးနွေးကြပြီး၊ Solar Energy တပ်ဆင်မည့် စနစ်အမျိုးမျိုးအပေါ် ညှိနှိုင်း ဆွေးနွေးခြင်း၊ Solar ကုမ္ပဏီများ၏ ရင်းနှီးမြှုပ်နှံမှုဖြင့် ရရှိမည့် လျှပ်စစ်ဓါတ်အားကို ဝယ်ယူ သုံးစွဲရေး၊ လယ်ယာသီးနှံများတွင် စိုက်ပျိုးရေ ရရှိရေး ဆောင်ရွက်မည့်ကိစ္စများ စသည်တို့ကိုလည်း ညှိနှိုင်းဆွေးနွေးခဲ့ကြောင်း သိရသည်။