အိမ်ဖြူတော် ထိပ်တန်းအရာရှိများသည် ယီမင်စစ်ပွဲဆိုင်ရာ အစီအစဉ်များကို သတင်းသမားတစ်ဦးပါဝင်သော အုပ်စုတစ်ခုထံ မှားယွင်းပေးပို့ခဲ့မိသည်ဟု အိမ်ဖြူတော်က တနင်္လာနေ့တွင် ပြောကြားခဲ့ပြီး ယင်း အမှားအယွင်းအပေါ် ဒီမိုကရက်တစ် အမတ်များက ချက်ခြင်း ပြစ်တင်ရှုတ်ချခဲ့ကြသည်။
“Houthi PC small group” ဟု အမည်ပေးထားသော Signal မက်ဆင်ဂျာပေါ်ရှိ ကုဒ်ဝှက် group chat တစ်ခုက မတ် ၁၃ ရက်တွင် သူ့ကို မမျှော်လင့်ဘဲ ဖိတ်ကြားခဲ့သည်ဟု The Atlantic မဂ္ဂဇင်း အယ်ဒီတာချုပ် ဂျက်ဖရီ ဂိုးဘတ်က တနင်္လာနေ့တွင် ပြောကြားခဲ့သည်။
ယီမင်ရှိ ဟူသီသူပုန်များအပေါ် အမေရိက၏ အကြီးစားတိုက်ခိုက်ရေး အစီအစဉ်များအကြောင်းကို တိုက်ခိုက်မှု မစမီ နာရီပိုင်းအလိုတွင် အဆိုပါ ဂရုမက်ဆေ့ချ်များအရ ဂိုးဘတ် သိရှိခဲ့ရသည်။
ပင်လယ်နီတွင် ဖြတ်သန်းသွားလာသော သင်္ဘောများကို တိုက်ခိုက်နေမှုအတွက် မတ် လ ၁၅ ရက် နေ့တွင် အမေရိက,က ဟူသီအဖွဲ့ကို တိုက်ခိုက်မှုများ လုပ်ခဲ့သည်။
အဆိုပါ တိုက်ခိုက်မှု မစမီတွင် အမေရိကန်ကာကွယ်ရေးဝန်ကြီး Pete Hegseth က ပစ်မှတ်များ၊ အမေရိက ဖြန့်ကျက်မည့် လက်နက်များ၊ တိုက်ခိုက်မှု အစီအစဉ်ဆိုင်ရာ သတင်းအချက်အလက်များ အပါအဝင် စစ်ဆင်ရေးဆိုင်ရာ အသေးစိတ်အကြောင်းအရာကို ဂရုတွင် ပို့စ်တင်ခဲ့သည်ဟု ဂိုးဘတ်က ပြောဆိုသည်။
အဆိုပါ group chat တွင် ဒုတိယ သမ္မတ ဂျေဒီဗန့်စ်၊ နိုင်ငံခြားရေးဝန်ကြီး မာကို ရူဘီယို၊ စီအိုင်အေ ညွှန်ကြားရေးမှူး ဂျွန်ရက်လစ်ဖ်နှင့် အခြားသူများကို ကိုယ်စားပြုသော အကောင့်များလည်း ပါဝင်ခဲ့သည်ဟု ဆိုသည်။
ချက်တင် တစ်နေရာတွင် ဗန့်စ်ဟု သတ်မှတ်ခံရသူက ပင်လယ်နီတွင် သင်္ဘောများ အခက်ကြုံနေမှုကို ပိုမိုရင်ဆိုင်နေရသော အမေရိက၏ မဟာမိတ် ဥရောပအတွက် အမေရိက၏ အကူအညီသည် ထိုက်တန်ပါသလားဟူသော မေးခွန်းထုတ်မှုမျိုး ပြောဆိုခဲ့သည်ဟု ဆိုသည်။
ယင်းတွင် Hegseth ဟု မှတ်ယူခံရသူက “ဒုတိယသမ္မတကြီးရေ ဥရောပအတွက် အခမဲ့ ဝန်ထမ်းရတာကို ခင်ဗျား မနှစ်မြို့တာ ကျွန်တော် အပြည့်အ၀ နားလည်ပါတယ်” ဟု တုန့်ပြန်ထားခဲ့သည်။
သမ္မတ ဒေါ်နယ်ထရမ့်ပ်က နိုင်ငံတော် အကြမ်းဖက်မှုတန်ပြန်တိုက်ဖျက်ရေး ဗဟိုဌာန ညွှန်ကြားရေးမှူးအဖြစ် အမည်စာရင်းတင်ထားသော Joe Kent သည် အထက်လွှတ်တော်က ထောက်ခံအတည်ပြုထားခြင်း မရှိသေးသော်လည်း ယင်း ဂရုတွင် ပါဝင်နေသည်မှာ ထင်ရှားသည်ဟု ဆိုသည်။
အဆိုပါ ချက်တင်သည် အစစ်အမှန်ဖြစ်ပုံရသည်ဟု အိမ်ဖြူတော် နိုင်ငံတော် လုံခြုံရေးကောင်စီ NSC ပြောရေးဆိုခွင့်ရှိသူ Brian Hughes က ပြောဆိုပြီး ချက်တင်တွင် မှားယွင်းသော နံပါတ်ကို ထည့်သွင်းခဲ့မိမှုနှင့် ပတ်သက်၍ NSC က ပြန်လည်သုံးသပ်နေသည်ဟု ဆိုခဲ့သည်။
The Atlantic ၏ သတင်းဖော်ပြချက်နှင့် ပတ်သက်၍ မေးမြန်းမှုအပေါ် ချက်တင်တွင် စစ်ပွဲအစီအစဉ်များကို မျှဝေခဲ့ခြင်းမရှိကြောင်း Hegseth က ငြင်းဆိုခဲ့ကာ ဂိုးဘတ်၏ ယုံကြည်စိတ်ချရမှုအပေါ် တိုက်ခိုက် ပြောဆိုသွားခဲ့သည်။ Ref: ယဟျူးနူးစ်